Modi-i Balochistan atema bilemtsür, Dalit nunger atemabo tenük tapok:Congress

New Delhi, August 21 (Agencies) : State nung Dalit nunger mezüngmeshiba dak sentakba nung Deobarnü Gujarat nung Congress lenirtemi linük Tir Pranab Mukherjee nem takhangba ka agütsüogo. Iba den külemi Ato Kilonser Narendra Modi-i Balochistan atema bilemtsütsü mapangbo peria angur saka pei state nung Dalit nunger okrongba tsütsübo pa tenük tapok, ta parnoki aitsüogo.
Parnok lenirtemi, Dalit nunger merenshirtem dak tapet inyaktsü mapang lateta agütsüogo aser iba inyakyim nung linük tir teka-a adentsüla, ta ashi.
Gujarat Pradesh Congress Committee (PCC) nungi iba takhangba shidi agütsüi aoertemji PCC tekolakba Bharatsinh Solanki, Congress Tir indang Political Secretary Ahmed Patel, Congress legislature party lenir Shankar Sinh Vaghela aser AICC Tongti Tezülur Madhusudan Mistry nunger liasü.
“Linük Ato Kilonser Modi-i Balochistan nunger timtemba atemabo kanga bilemtsür ajisüaka temulung shirangtsüka pa aser pai aniba telokji linük nung pi memeneper aser timtemertem tsütsübo tenük tapok,” ta Gujarat PCC tekolakba Bharatsinh Solanki-i ashi.
“Gujarat nung telok balala meputepba indang onoki Tir nem metetdaktsüogo. Iba mepetmesü ya BJP-i küm 18 yimsüsüba mapang nungi tenzük. Una nung atalokba ya ajungbena atalokba ka masü saka ibai talangka nungi benshia aruba yimya ka lir. Una nung Dalit nunger merenshia azükba sülena Gujarat administration-i tai inyakertem nem tapet temerenshi magütsüba ajanga state ketdangsertem dak nübur azüoktsü tashi maitba ajiteter,” ta pai shisem.
Solanki-i, “Pai (Modi-i) tebang agiba ozüng alema benshirtem atema kanga sashia jembi ajisüaka Chief Minister ka ama pai item nisung azüokba indangbo kecha mashi. Lokti nung telemsa adokdaktsütsü tebilemba nung inyaker party kati Gujarat tebilemtsü shishia magitsü amai onokibo bilemer,” ta ashi.
State nung iba tebilemtsü koktettsü atema state Angh ajanga inyak nung ajungtsü, ta Congress lenirtemisa Mukherjee dang mepishi.
“Onoki iba tebilemtsü atema Tir dak arua jenoker aser pa dang pa akhümket office tem ajanga state ketdangsertem nem tetuyuba tajung agütsütsü takhangba ka agütsüogo,” ta Solanki-i ashi.