Modi-i bendanglen semdangba ajanga kechi ajangzüker: Cong

Ireland, Sept. 23, 2015: Bodhbar nikongdang Ato kilonser Narendra Modi Dublin airport tonga aruba mapang Ireland Health Minister, Leo Varadkar-i pa agizükba noksa nung angur. 

New Delhi, September 23 (Agencies): Tanü Ato kilonser Narendra Modi-i Ireland aser US na anogo tenetnü semdangtsü atema New Delhi nungi aposoa aoba mapang ka nung Congress Party-i, pai bendang linük aiben semdangba ajanga linüki kechi ajangzüker, ta ashi.
“Ato kilonseri linük balala aika sema senzür, ajisüaka itemji ajanga India atema tajangzük bener arutsüba mali,” ta Congress otongdar R P N Singh-i New Delhi nung osangbenertem dang ashi.
Ato kilonser Modi-i US semdangtsü lia US defence major Boeing den US sen billion 3.1 tezüngzüktep yangluba dak sentakba nung Singh-i, iba tetezü item ama ainlen senzüba ajanga “Make in America” tajangzük angutsü, iba ya pai (Modi) yimyim ayimba ‘Make In India’ ama masü, ta ashi.
“Ao kilonseri linük balala aika sema senzüba mapang Nepal ama linük kati-a India nungeri inyakba ashishiba o jembir,” ta Congress lenir Singh-i ashi.
Congress party tatong Tir Rahul Gandhi-i US semdangba atema BJP-i aitsüba dak sentakba nung ibaji aija Congress otongdari BJP aitsüogo.
“Rahul Gandhi bilemba anenang. Congress tatong Tir maitsüi BJP-i nüburtem dang nangzükbatem nung temelung agütsütsüla,” ta Singh-i ashi.
Tanep BJP lenir Sambit Patra-i, Gandhi-i US semdangbaji “kari kangshia yokba asütsü” kechiyong Bihar nung Congress’ teloktep party- JD(U) aser RJD-i pa Bihar election nüboyim nung medendaktsüner, ta ashi.
Bodhbar nü Narendra Modi Ireland aser US nati apusoogo. Bodhbar nü pai Ireland semdangtsü aser kasa aonung New York (US)-i aotsü.