Modi-i BJP National Executive senden nung adener

Bhubaneswar, April 15 (Agencies): Uttar Pradesh aser Uttarakhand assembly elections nung takok tulu anguba aser ano Manipur o Goa nung parnoki anir sorkar kümtetba sülen BJP-i Odisha dak tenük yoker.
Odisha yimtiba Bhubaneshwar nung anogo ananü BJP National Executive meeting ayongzüka amener aser iba nung Prime Minister Narendra Modi aser BJP Tir Amit Shah na adener.
Tanü Bhubaneswar atongba sülen PM Modi-i indangindanga Raj Bhavan semdang aser idakji Odisha Angh, Dr S C Jamir den ajurutep. Iba sülen party züngsemtemi meiner pa senden amenba tesemi ao.
Bhubaneshwar kübok Janata Maidan nung aliba Sant Kavi Bheem Bhoi Sabhagar nung amenba senden nung BJP-i Odisha assembly elections aser 2019 küm Lok Sabha elections dak sendakba onüktem lemteptsü.
Tanü amenba senden nung mendenji Amit Shah liasü aser pai party lennirtem dang ashiba agi, “BJP atema tang ya tetenzüker ka dang lir aser tarutsü nung India ajungalen amentettsü atema party-i takok ngua mapa inyaktsüla.”
“Kodang asenok 2014 nung Centre sorkar akümtsüsa tashi angu, nübortemi BJP-i tenemlak tongogo ta jembi. Taküm assembly elections nunga takok angudang parnoki kasaji ashi, saka president Amit Shah-ibo BJP-i ano tenemlak matong ta ashir. Panchayat nungi Parliament tashi nung BJP alitsüla aser iba jagidang tenemlak atongbaji asütsü ta pai shiogo” ta BJP lennir Ravi Shankar Prasad-i tanü osangbener dang ashi.
“BJP-i Congress bo ajangtettsü saka regional party tem tsüngdang parnoki tamakok angur ta yimtenren nung mongin nisungtemi ashi saka assembly election result temi iba tangatetbaji melenshiogo” ta Prasad-isa shise,
Electronic Voting Machine (EVM) nung tim mesüi mapa inyak ya yimtenren telok kari aitsüba atema BJP president Amit Shah-i tanü ashiba agi, “Uttar Pradesh aser Delhi nung parnok tashi angudangbo SP, BSP aser AAP teloktemi EVMs amshiba atema mashitetep.”
“Taküm elections nung parnok tamakok anguba sülen, party kari tatemtsü atema EVMs onük nung ammeter. EVMs dak tai tongloktsüba ya Election Commission akhüm metsübuba sayur” ta Prasad-ia ashi.
“State pungu nung assembly elections magidang PM Modi-i state ajak sema senzü aser tang linük nung lennir nüngtugutibaji pa lir. Pai nübortem den sendaktepba ajanga, nübortemi pa dak temulung alemer. India nüjiso anguba sülen, nüngtugutiba lennirji pa lir” ta Amit Shah-isa metetdaktsü.
Anogo ananü senden nung Uttar Pradesh chief minister Yogi Adityanath-i anir BJP Chief minister 13 prong den teyaritepertem aser Union minister 45 tashi adener.