Modi-i Black Money alirtem tenüng sangdongtsüla: Anand Sharma

New Delhi, November 16 (Agencies): Tanü asükwa mongpu Rajya Sabha senden mezüngnü Congress lenir, Anand Sharma-i Ato kilonser, Narendra Modi dang, blackmoney sen rizünga alirtem tenüng ajak sangdongang, kechiyong parnok timbaka Ato kilonser nem narozük azüktsürtem asütsü, ta ashi.
Paisa, sen 500 aser sen 1000 note anentsütsü atema sorkari jilia sentong junga renema maliasü, ta aitsü.
Paisa, tang sen 2000 note tasenba ya chooran taseptsü nung anguba tanurtem kazütsü tu ang mesüker, ta ashi.
Banks aser ATMs nung nokdaker nübur jenti mezüngmeshiba atema Ato kilonseri tatok meshitsüla, ta Congress leniri ashi.
Paisa, Ato kilonseri sen anentsübaji miima inyak masü saka kar nembo iba osang jelia metetdaktsü, ta tai tongloktsü.
Sen tamshidak anentsüba ajanga alima dang India rongsenkettsüng tajemdakdakji ochimashi sen lir ta osang sangoktsüogo, ta pai aitsü.
“Iba ya aluyimba rongsenkettsüng lir. Aluyimertemi peii züsentetbatem bazaar nung yoka sen angur, süra ibaji ochimashi sen asü?” ta Anand-i asüngdang.
Taoba hopta ka piyong aayangertem tarensen nung nokdaker, ta pai ashi.
“Aluyimer shibai pa ‘dhoti’ (süoshi) nung credit card mesüra cheque book abener? Kodaser sen mamshiba (cashless) inyakyim benoktsü. Alima nung koba linük cashless lir?” ta paisa asüngdang.
“Kiralongrar shirnoki yanghu tulu nung sen taila bener melentepi aoer?” ta pai asüngdang.
Item o langzüa Piyush Goyal-i, India ji ochi kümra aser ochishia saru agütsüra state sorkartemi nüburtem taküm jenjang ajungkettsütsü atema inyaktsü, ta ashi.
Ano Congress lenir aser Opposition lenir, Ghulam Nabi Azad-i, “Tongti party tem nung lenirtemi jembibaji Ato kilonseri angatsüla. TV ajanga Ato kilonseri jembidang lenirtem pa o angar, anungji lenirtemi ashibaji paia angatsüla,” ta ashi.
CPI-M tongti lenir, Sitaram Yechury-ia sen 2000 ka amer, “Nisung shingaia iba ya maginer, kechiyong iba atema tanük aika meyipa agütsütsüsa akumtsü,” ta ashi.
Paisa, “Black money amshirtemi parnok yipten tegu nung sen rizünga mayur, saka kiojen, hon amala alizüker aser ibaji züindaktsür. Ayong nung tzürang tulutembo jenbur, saka ango tilatembo asür,” ta ashi.