Modi-i Chennai semdangba anema lungkak ait

Chennai, Rongchii (April) 12 (Agencies): Yangtepnü (Brihostibar) Prime Minister Narendra Modi-i Chennai semdangba anema nisung aikati lungkak ait aser iba mapang police-i Saidapet tesem nung lungkak aiter aika apu.
Parnoki ‘Go Back Modi’ ta yimyim ayima lungkak ait aser police-i apurtem rongnung MDMK tanishir Vaiko dena liasü.
Prime Minister Narendra Modi ya Mahabalipuram nung Defence Expo 2018 lapoktsütsü atema Chennai-i aruba liasü.
Modi Chennai tongli opposition party aser tanga teloktemi Cauvery Management Board tentettsü atema takhangba agüja lungkak ait.
Chennai airport nung telok balala nungi nisung 1,650 shi kati wako tanak aser balloon tem amer Modi anema lungkak ait.
Iba mapang Dharmalingam ta ser nisung katibo Modi-i Chennai semdangba anema pa sasa rongseta asütsü merang aser pa Erode Government hospital nung anir oa anepaludar.
Modi-i Tamil Nadu semdangdang pei pei kidang wako tanak atsüketang ta DMK working president MK Stalin-ia osang metetdakja liasü. Centre-i Cauvery tebilemtsü atema mapa kecha meinyakba anema pai iba mapa inyaktsü tuyu.
DMK tanishir Karunanidhi-ia tanü t-shirt tanak ka semer lungkak aitba nung shilem agi.