Modi-i China Tir, Xi dang India’er NSG atema teyari meshi

June 23, 2016 nü Ato kilonser, Narendra Modi Uzbekistan yimtiba, Tashkent tonga arudang Uzbekistan Ato kilonser, Shavkat Miromonovich Mirziyoev-i agizükba noksa nung angur.

Tashkent/New Delhi, June 23 (Agencies): India-i Nuclear Suppliers Group (NSG) nung züngsem akumtsü atema kanga merangba mapang ka nung tanü Uzbekistan yimtiba, Tashkent nung India Ato kilonser, Narendra Modi-i China linük Tir, Xi Jinping ajurua India linük NSG nung züngsem akumtsü atema nungitdaktsüner ta mepishiogo, ta osang angazüker.

Yangi Modi aser Xi na ajuruba ajanga anogo ananü South Korea yimtiba, Seoul nung plenary senden nung temelenshi alitsü.

China den Turkey, New Zealand aser South Africa linüktemia India NSG züngsem akumtsü anema noktaker ta osang angazüker, ajisüaka China-i India pusemra tanga linüktemi anembaji tashimeiti akumtsüsa lir.

India linüki NSG nung züngsemtsü merangba maparen nung China telemtetbaji kanga tongtibang asutsü, ta osang angazüker.

Modi Shanghai Cooperation Organisation (SCO) senden nung adentsü atema tanü Tashkent tonga aru.

Iba jakdang Pakistan Tir, Mamnoon Hussain-i China Tir, Xi ajurua Pakistan-i NSG nung züngsemtsü merangba nung China-i pusemeba atema pelar ta lemsatepa liasü.

India NSG nung züngsemtsü anemba temaitsü tejangja sayua yashi China-i, NSG züngsemtem tsüngda tangatetba balala indang jembia liasü.

India aser Pakistan nati NSG nung züngsemtsü merangba nung China-i tongtibang shilem agitsü, ajisüaka China-i Plenary senden nung iba ya onük ka masü, ta shiogo.

SCO senden den külemi anogo ananü NSG sendena tanü Seoul nung tenzükogo.

US aser France natibo India NSG nung adentsü atema züngsem linüktemi nungitdaktsüner ta sangdongogo.