Modi-i Citizenship Bill benoktsü nangzük; Gogoi-i aitsür

Guwahati, April 11 (Agencies): Assam kübok Barak Valley nung Hindu Bengali vote dak tenük yoka tanü Prime Minister Narendra Modi-i sorkar akümtsü tashi ngura Citizenship (Amendment) Bill, 2016 meyipa bener arutsü ta ashi.
Brihostibarnü Silchar nung nüboyimba sentong ka nung Prime Minister Modi-i ashiba agi “Citizenship Bill nung temelenshi kar asüba sülen benoktsü.”
Tanü Modi-i Assam nung sentong ana nung aden. Ka Barak Valley kübok Silchar nung aser ka Mangaldai Lok Sabha Constituency kübok Kendukona nung liasü.
Ajisüaka, Modi-i Brahmaputra aser Barak Valley nung olen balala jembi. Mangaldai nungbo pai Citizenship Bill indang khenyongi mejembi saka Silchar nung jembiba onük nungbo CAB indang teimba jembi.
“Onoki Citizenship (Amendment) Bill, 2016 tanaben bener arutsüsa. Ajisüaka, iba Bill mapa küma inyakba nung onoki sendaktepba alir ajak den tongteptsü” ta Modi-i ashi.
1947 küm linük ana akümba ya Congress ajanga lir aser iba ajanga nisung karbo pei linük nung bendangertem kümer lir, ta paisa shisem.
Taküm January ita NDA sorkari Citizenship Bill benoktsü merangba anema Brahmaputra Valley nung alirtemi ola adok.
Tawa BJP-i parnok LS party manifesto nung Citizenship Bill enoksemba sülen Brahmaputra Valley nung kaketshir telok aser civil society organizations-i Bill anema lungkak aitba tenzükshiogo.
“Ozü sorkari Triple Talaq bill agizüktsü aser Congress, All India United Democratic Front (AIUDF) teloktep ‘mahamilawat gatbandhan’ den tanga party temi asen jalatem temeten angutsü atema tenokdangba magütsütettsü” ta tanü Modi-isa ashi.
2014 küm ama tang-a linük nung ‘Modi wave’ adoktsü aser tanü Assam kübok Lok Sabha menden 5 atema election agiba nung BJP aser onok den yaritepertemi dang takok angutsü. Barak Valley nung alirtemi BJP nem vote enoktsütsü ayongzüker, ta paisa metetdaktsü.
Külen, Congress lennir tejen aser taoba Assam chief minister Tarun Gogoi-i tanü Prime Minister Narendra Modi aitsü.
Polling anogo nung Assam semdangba ajanga Modi-i Model Code of Conduct (MCC) alema inyakogo, ta Gogoi-i ashi.
“Modi-i asüng ang nüboyimba mapa inyaktsüba asü kechiyong asüngbo polling magitsü” ta paisa shisem.
Modi-i MCC alema mapa inyak aser Assam Agitation nung taküm bendang agütsürtem tenüng amer vote angutsü meranger, ta Gogoi-isa tai tongloktsü.
“Assam Agitation nung taküm bendanga agütsürtem tenüng amer vote meshibaji MCC alema inyakba mapa ka ama züngoktsü akok. Taküm bendanga agütsürtemji BJP nunger masü saka ozü nisungtem liasü” ta paisa shisem.