Modi-i defence ketdangsertem ajurua senden amen

New Delhi/London, September 24 (Agencies): Kozhikode, Kerala nung Ato kilonser, Narendra Modi-i onük jembitsü lia Honibarnü pai par kidang Army tongti, Air Force tongti aser Navy Vice Chief  den senden ka menogo.
Tawa kiralongrartemi Jammu & Kashmir, Uri nung army camp ka amakba sülen Modi-i tanü sepai tongti ketdangsertem ajurur.
Osang angazükba agi, iba senden nung Ato kilonser Modi-i Uri amakba sülen security tensa aser India-i koba yimya ka nung meyiptsütsü, iba onük nung o lemtepogo.
Ita shia Ato kilonseri armed forces tongtitem den senden amener, aser iba senden nung onük aika nung o lemteper.
Army Chief General Dalbir Singh Suhag, Air Chief Marshal Arup Raha aser Vice Chief of Naval Staff Vice Admiral KB Singh nungeri Modi ajurua saka Navy Chief Admiral Sunil Lanba bo jila nung maliba agi iba senden nung medentet.
Kasa senden nung National Security Advisor (NSA), Ajit Doval-a dena liasü.
Taoba Deobar anepdang Uri amakba sülen ghonda ishika tsüngda Ato kilonseri twitter ajanga, aibelenertem memerenshi ang malitsü, ta linük nüburtem dang nangzüka liasü.
Union Defence Minister, Manohar Parrikar-ia, Uri amakertem memerenshii ang malitsü ta Ato kilonseri nangzükbaji jembiba kija masütsü, saka mapa agi inyaktsü, ta shiogo.
September 18, 2016 anepongi kiralongrartemi Jammu & Kashmir, Uri jila nung aliba army tesep ka amakdang sepai 18 tashi tepseta liasü.
Ano tanga osang ka nung Pakistan Ato kilonser, Nawaz Sharif-i India dang, Uri amakbaji Kashmir tensa atema meyiptsüba asütsüa akok, anungji Pakistan nem tai tongloktsüba anentsüla, ta metetdaktsü.
UN General Assembly senden nung adenba sülen New York nungi meyipa arudang pa London nung anenzüka liasü. Yangji osangbenertem den jembidang Pakistan Ato kilonseri, “Uri amakbaji Kashmir nung meimchir dak mapetba benshiba ajanga asütsüa akok, kechiyong tesüiba ita ana nung asürtem aser tenük apoker kinungertem aser temeimertem kanga temelung yiruogo aser jashiogo,” ta ashi.
Sharif-isa, “Kashmir nung India nungeri meimchir dak tim mesüi benshibaji alima ajaki meteta lir. Tang tashi nung Kashmir nung nisung 108 shi tepsetogo, nisung 150 shi tenük  pokogo aser merirjang aika yiruogo,” ta ashi.