Modi-i Delhi-Faridabad Metro line lapoktsütsü

 

Chandigarh, September 04 (Agencies): Ato Kilonser Narendra Modi-i Deobar nü Badarpur nungi Escorts Mujesar (Faridabad) tashi jajatsü asoshi metro line lapoktsütsü aser iba sülen nungi Faridabad, Haryana nung alirtem Delhi Metro ajanga jajatettsü asoshi maongka angutsü.

Faridabad yimti ya Haryana state asoshi industry tesep ka lir. Anungji Delhi Metro agi Faridabad tashi atongba ajanga yimti ana tsüngda nung nüngdakba osettem karakara belenshitettsü. Anogo shia iba yimti ana tsüngda nung nisung 200,000 shi jajar aser ibaji ajanga lenmang nung mesemi kanga nungteper, ta Haryana sorkar otongdar-i Hokolbar nü metetdaktsü.

“Metro line lapokba ajanga ainlen jajartem kecha timtem makai jajatettsü aser mapang o rongsen den tashi kanga melalutsü,” ta otongdar-isa ashiba mapang paisa, “Faridabad tashi metro line arua alibaji lateta agütsüba sen amshia noklang nung shilem 95 tashi state-i acha ayanga yanglu,” ta otongdari ashi.

“Iba ya lapokba ajanga nüburtem sen kanga melalui jajatetba dang masü saka gari dang nungi tekaraba, anitesüngzükba aser lendong maliba asütsü. Iba ama senzüsempongtsü maliba ajanga gari lenmang nung kanga timtemtepa liasü aser ibaji ajanga rongsen tali laluba den mapanga kanga lalua aruogo. Gari nung totzü arungba ajanga mopung menena kümdaktsüba dang masü saka gari nung totzü enokba kija nung sen jenti lalur,” ta pai ashi.

Tan lapoktsü aliba metro line nung ya station toku konghia lir. Itemji- Sarai, NHPC Chowk, Mewala Maharajpur, Sector 28, Badkal Mor, Old Faridabad, Neelam Chowk Ajronda, Bata Chowk aser Escorts Mujesar. Iba ya tang ITO nungi Badarpur tashi tejajadak aliba metro indang Violet Line kongsang lir.

Item Station ajak ya Delhi-Mathura Road (NH-2) anasa timba lir.

Iba project ya lateta agütsüba sen crore 2,494 agi renema yanglu aser iba metro line tasazükji kilometre 13.875 talang lir.