Modi-i G20 senden mapang China Tir ajurua senden amentsü

Hangzhou (China), September 03 (Agencies): G-20 senden nung adentsü atema Honibarnü Ato kilonser, Narendra Modi Hangzhou, China tonga aruogo, iba senden mapang nungsa pai China Tir, Xi Jinping ajurua jurila senden ka amentsü.
G20 summit nung India-i alima rongsenkettsüng, sensak tia aser green finance densema tongtibang onüktem nung temelenshi atema benoka jembitsü.
Modi-i China Tir den senden amendang pai Nuclear Suppliers Group (NSG) nung India züngsem akumtsü atema benokba aser China-Pakistan Economic Corridor (CPEC) tebilemtsü onüktema süoka jembitsü südi.
Deobar anogo nungi tenzüka China anüdoklen Zhejiang Province yimtiba, Hangzhou nung anogo ananü G-20 senden akatsü. Tanep Modi Vietnam nung liasü aser tanü China tonga aruogo.
China nunger mongintemi, Modi aser Xi na senden amenbaji ajungtsü, ta shiogo.
Osangbenertem den jembidang China sorkar think tank Director, Hu Shisheng-i, “India NSG züngsem akumtsü atema onoki anema menokdaker. China Foreign Minister (Wang Yi)-i India semdangba (August ita nung) sülen linük anapronglai item ama onük ajak kongshia jembitsü bangjemogo,” ta shiogo.