Modi-i Gujarat nung inyaktetba mapatem linük nung meinyakteter: SS

Mumbai, January 30 (Agencies): Ato kilonser Narendra Modi aitsüba olen ka nung Honibarnü BJP den teloktep party, Shiv Sena-i, nüburtem dang nangzükba aser sangdongbatem ano meinyak, ta ashi.
“Modi-i pai Gujarat nung inyaktetbatem National level nung inyaktsü atema timtem ajurur. Sangdong balala agütsüogo, aika nangzükogo, ‘tajung anogotem’ prokogo, ajisüaka item ajak jagi nübur ket matong,” ta Shiv Sena indang osangkaket Saamana yimobilem ajanga ashi.
“Tangbo, Modi-i mapa makoker ketdangsertem pei kidangi meyipa yoktsü tuyur anungji, nüburtemi ‘tajung anogotem’ imlaa pelateper,” ta Sena-isa ashi.
Shiv Sena-i, “Ato kilonser inyaka arur rongnung Modi ya tashi taittiba aser nüngtuguba, ajisüaka tashitait Modi-ia sorkar den madenba ketdangsertem ajanga timtem ajurur,” ta ashi.
“Modi’er sorkar tashii arur joko küm ana aor, saka ochimashi maparen, osettsüset nung jenjang atuba, kiralongraba tebilemtsü, rongsenkettsüng timtem, aluyimertem tebilemtsütem aser mapa manguba tebilemtsü maneni lir, aser iba atemaji sorkar den madenba ketdangsertem nem tai tongloktsür,” ta kasa yimobilem ajanga ashi.
“Hema Malini (BJP MP) nem sen 70,000 agi sen crore aika jenjang ali agütsü, aser iba nungji sorkar den madenba ketdangsertemi tetsükdaktsü bener marutsü. Anungji sorkar den madenba ketdangsertemi sorkar tashi manger ta jembitsüji tim masü,” ta parnokisa ashi.