Modi-i India-Bangla Power Transmission Line lapoktsü

March 23, 2016 nü New Delhi nung Ato kilonser, Narendra Modi-i video conferencing ajanga remote contraol agi India aser Bangladesh na tsüngda transmission interconnection system tenzüktsüdang agiba noksa angur.

Agartala, March 23 (Agencies): Tanü Ato kilonser, Narendra Modi-i video conference ajanga remote control agi Tripura, Palatana nungi Bangladesh tashi 100 MW power supply lapoktsüogo.
Kasa mapang nung Bangladesh Ato kilonser, Sheikh Hasina-i India nem 10 GB Internet bandwidth agütsü aser sentong ajakji video-conference ajanga agia liasü.
Modi-i, “Kati ka dak metaloker aliba putu ka nung linük anati maneni tesentaktep akangshitsü, aser linük anapronglai terenlok ajungkettsüba ajanga iba anogo ya tongtibang anogo ka,” ta ashi.
Bangladesh Ato kilonser, Hasina-ia, “Power aser Internet bandwidth agütsüba ajanga linük ana tali longjemogo,” ta ashi.
Ato kilonser Modi-isa, “March 26 nü Bangladesh-i National Day amungtsü aser ni Bangladesh ‘Father of the Nation’ nem akhüm agütsür. Linük ana tsüngda tesentaktep tajungji ‘Bangabandhu’ mapang tenzük aser maneni aji oda lir,” ta ashi.
Modi-i ‘Bangabandhu’ tetshiba ya Hasina tebu aser Bangladesh tentetba lenir, Sheikh Mujibur Rahman lir.
Asembuba International Internet gateway lapoktsüba ajanga northeast nung aliba state tiprong tajangzük agutsü ta shia Modi-i, Bangladesh, India, Nepal aser Bhutan-i gari lenmangtem sentaktepba nung terenlok kanga kaogo, ta ashi.
“Tangbo India aser Bangladesh na tzü, surface communication aser anüng nung sentaktepogo. Onoki space nunga Bangladesh den sentaktepner,” ta paisa ashi.
Hasina-i, “1971 küm liberation movement nung India-i yaribaji onoki kodanga mamatsü,” ta ashi.
Tanü iba sentong nung Tripura Chief Minister Manik Sarkar-a dena liasü.