Modi-i kiralongraba agizüktetba ya tembangtsüla: Shiv Sena

Mumbai, January 11 (Agencies): Kiralongrartemi Pathankot amakba dak sentakba nung Hombar nü Shiv Sena-i, Ato kilonser Narendra Modi-i item ama amakba agizüktetba ya tembangtsüla, ta ashi.

“Asenoki kiralongraba agizükteta aremzükba ya junger. Saka ajak nung arrla ka lir. Item ama amakba Modi-i agizüktetba ya tatembang kati arutsü atema onoki bilemtsür,” ta Shiv Sena indang ‘Saamana’ yimobilem ajanga ashi.

“Pathankot tatalokba nung US linüki Pakistan dang tekümdangtsü shiogo, aser teti ataloka aruba ama, ibaji Pakistan nunger okadak lir. Tarutsü nung ano kechi ataloktsü, ibaji asen ket nung lir,” ta Shiv Sena-i ashi.

“Kiralongrar telok JeM-i, kiralongrar nisung trok ji India nunger army den memedemdangtet ta jembiba ajanga yirua aliba zübo nung ano metsü inoktsüogo,” ta Shiv Sena-i ashi.

Tsükchirtem nem telangzüba tajung ka magütsüra item ama amakba ya manentsü, ta parnokisa ashi.

India yimsüsürtemi “Kshatriya dharma” mebenshira aser mapang shitak nung tsükchirtem mazüoktetra parnok azüoktsüji India atema kanga tasak asütsü, ta Sena-i ashi.

January 02, 2016 nü kiralongrartemi Punjab nung aliba Air Force Station Pathankot amakdang sepai tenet tashi tepset aser nisung 17 shi yiruja liasü.

Sepaitem aser kiralongrartem tsüngda mapang talangka raradang kiralongrartema trokprongla kahsetogo.

Iba tatalokba sülen January 4, 2016 nü nü Pakistan-occupied Kashmir (PoK) nung amenoka aliba telungpur telok, United Jihad Council (UJC)-i parnok sasa Punjab nung Pathankot Airbase amakbaji parnoki lir ta tenüng agiogo.

You must be logged in to post a comment Login