Modi-i lenla ajaklen tamakok nguogo: Mulayam

New Delhi, March 23 (Agencies): Tanü Samajwadi Party (SP) tongti, Mulayam Singh-i, Centre nung BJP-i aniba NDA sorkari lenla ajaklen tamakok nguogo, ta aitsü.

Bodhbarnü Sahthiyao nung nüboyim sentong ka nung jembidang Yadav-i, “Parnoki mapa mangurtem nem mapa agütsütsü nung tamakok nguogo. Shishilembartem ashioktsüogo, aser linük arrtsütem kümzüka ayutsü atema meinyaktet,” ta ashi.

Paisa, linük nung osettsüset nung jenjang kanga tuogo saka Ato kilonser, Narendra Modi kanga mazüngi bendang linüktem sema senzür, ta ashi.

Pai ashiba agi, 2017 küm maneni par party sorkar tashii arura sorkar mapatongtemji nüburtem nem lemtetdaktsütsü aser party lenirtem kanga kümküma alitsü.

SP sorkar den medemdangtsüsa tanga party mali, kechiyong parnoki lenla ajaklen nangzüka alibatem ataloktsüogo, ta pai ashi.

Tanübo sentioset balala yanglurtem lungkak aitdar, ajisüaka Union Finance Minister, Arun Jaitley-i parnoki ashiba manger, ta pai aitsü.

SP tongti-i, pai sentioset yanglurtem onükji Parliament nung süoka jembitsü, ta ashi.

Cricket asaya aija Yadav-i, British nunger yimsüsüba kübok aliba linüktemi ang iba saisapong asayar, ta ashi.

Linük nung terenlok atema kho-kho, melangtepba aser cycling saisapongtem asayatsüla, ta paisa ashi.

Iba senden nung taoba mapang Rajya Sabha züngsem, Amar Singh-ia, SP sorkari state nung terenlok agütsür, ta metetdaktsü.