Modi-i Manipur, Mizoram atema train tasen tenzüktsüogo

May 27, 2016 nü Shillong, Polo Grounds nung Nagaland Chief Minister, T.R Zeliang aser Ato kilonser, Narendra Modi na den North East Chief minister tem aser Angh tem tangokba noksa angur. 

Shillong (Meghalaya), May 27 (Agencies): Hokolbarnü Ato kilonser, Narendra Modi-i North East tesem nung railway jenjang ajungkettsü atema Manipur aser Mizoram na nung passenger train tasen tenzüktsüogo.
Item train tasenji Bhairabi Silchar aser Jiribam Silchar passenger train lir, aser ibaji ajanga India’er broad gauge passenger railway map nung Mizoram aser Manipur na züngoktsü.
Ano külen Kamakhya-Katra Express train ajanga Assam aser Jammu & Kashmir na indangindanga sentakteptsü.
Shillong nung aliba Polo Grounds nung item train tenzüktsüdang Ato kilonser Modi-i, “North East tesem nung railway tajungba akümtsü atema onoki sen crore 10,000 lemzüktsüogo,” ta metetdaktsü.
Pai ashiba agi, North East tesem nung railway network ulushitsü atema taküm Railway ministry-i sen crore 5000 intoktsü sentong lir.
Modi-isa, North East tesem nung railway dak alia gari lenmangtem, telecommunication, tzü aser light jenjang tajungba akümtsü atema Centre-i mission policy ka latetogo, ta ashi.
“Iba ya ajanga tesem nung rongsenkettsüng tajungba akümtsü,” ta paisa shisem.
Tanep Shillong nung North East Council (NEC) 65buba Plenary senden nung jembidang Modi-i, northeast state temji Southeast Asia-i aotsü lenmang lir, ta ashiba den külemi paisa, kidanger linüktem den ronsenkettsüng terenlok atema India-i gari lenmang aser rail lenmang naprong lapokyonga aoer, ta metetdaktsü.
“Anüolen linüktem nung terenlok katetra, kodaser linük north east nung terenlok malitsü,” ta paisa ashi.
“Northeast tesem ya kanga tongtibang lir aser iba tesem ya terenlok aliba tesemtem den liromedema terenlok katsütsüji kü tangatetba lir,” ta paisa shisem.
Kasa senden nung railway ketdangsertemi, 2011-12 küm North East tesem nung railway line kilometer 68 tenzükja liasü aser 2015-16 küm nungbo kilometer 537 kümogo, ta metetdaktsü.
Parnokisa, tang teinyaktak railway project 25 nung sen crore 63,045 shi intoktsü aser taküm April 1 nungi tenzüker tang tashi nung sen crore 29,095 intokogo, ta metetdaktsü.
Tanga project tem renemtsü nükjidong metetdakja ketdangsertemi, Bhairabi-Sairang (Mizoram) lenmangji 2018-19 küm tashi nung renemtsü aser Dimapur-Zubza (Nagaland), Sevok-Rangpo (Sikkim) aser Byrnihat-Shillong (Meghalaya) lenmangtem 2019-20 tashi nungbo renemtsü, ta ashi.
Sangküm küm tetenzüklen Meghalaya nung Tetelia-Byrhinat lenmang renemtsü atemzüka lir.
Plenary senden nung North East state tem nungi Anghtem aser Chief Minister tem den tongti ketdangsertem aika dendar.