Modi-i Manmohan anema jembiba ashishia Congress MP temi senden nungi ayazük

New Delhi February 09 (Agencies): Rajya Sabha nung Ato kilonser, Narendra Modi-i taoba Ato kilonser, Manmohan Singh aitsüba sülen tanü Congress MP temi tejashi nung Lok Sabha senden nungi ayazüka alu.
Zero Hour tenzükli House nung Congress lenir, Mallikarjun Kharge-i iba onük benoktsü merang, saka ibaji memelai Speaker-i, tanga House (Rajya Sabah) nung tatalokba onük ka benoktsü makok, ta ashi.
Parliamentary Affairs Minister, Ananth Kumar-ia, iba onükji Lok Sabha nung benoktsü makok, ta ashi.
Congress lenir Kharge-i, “Modi-i Singh indang kechisa jembiogo, ibaji Parliamentary democracy ka atema majung” ta ashidang Speaker-i pa songtema liasü.
Congress Tir, Sonia Gandhi-i repranga lia Congress züngsemtemi sabangleni oa, Ato kilonseri jembiba o atema pai tatok meshitsüla, ta takhangba agütsü.
Iba sülen tejashi nung Speaker, Sumitra Mahajan-i, nenoki tanga züngsemtem temeten rakzüker, kechiyong nenoki parnok nem jembitsü maongka magütsür, ta ashi.
Kharge-isa, Modi-i kechi jembiogo, ibaji linük atema mezüngmeshi ka lir, ta ashi.
Iba sülen Congress züngsemtemi longkak aita senden nungi ayazüka alu.
Iba dak sentakba nung tanü Uttarakhand nung election nüboyim sentong ka nung jembidang Congress tatong Tir, Rahul Gandhi-ia, Modi-i jembiba oji linük ajunga mezüngmeshiba lir, ta aitsü.
Rahul-i, “Kodang Modi-i iba ama o jembidir, pai Manmohan dang masü saka linük rangben nüburtema mezüngmeshir,” ta ashi.
Paisa, iba ya taaktsüka lir aser Ato kilonser menden jenjang ajema kümdaktsüba lir, ta ashi.
“Tamalen inyakertem (Ato kilonser) akhüm metsübui jembiba mezüng Ato kilonserji Modi asütsü. Pai yimya tajung angazüktsüla,” ta paisa ashi.
Yashi Rajya Sabha senden nung jembidang Modi-i taoba Ato kilonser, Manmohan Singh aija, “Pai ‘raincoat’ semer tzü chigotsü junga meteta lir, kechiyong par sorkar mapang ochimashi aika liasü, saka pabo ochimashi tarak maket,” ta jembia liasü.