Modi-i Mizoram, Arunachal Statehood Day salem lemsatep

Itanagar/Aizawl, February 20 (Agencies): Hombarnü Arunachal Pradesh aser Mizoram Statehood Day anogomung mungogo aser Ato kilonser, Narendra Modi-ia state ana nüburtem den state jenjang anguba anogomung salem osang lemsatep.
Twitter ajanga Modi-i, “Arunachal Pradesh sensotem den Statehood Day salem lemsateper. State-i tarutsü nung terenlok tsütsü jenjang tasen atongtsü sarasademtsür. Statehood Day nung ni Mizoram nüburtem den salem lemsateper. Tarutsü kümtem nung Mizoram kanga renloktsü ni sarasademtsür,” ta lemsatep.
Ano Union Home Minister, Rajnath Singh-i state anaprong den salem osang lemsatep.
Rajnath-i twitter ajanga, “Statehood Day nü ni Mizoram nunger den salem lemsateper. Iba state maneni renloktsü ni sarasademtsür. 31buba ‘State Foundation Day’ nung ni Arunachal nüburtem den salem lemsateper. Iba state nung terenlok aser azükaru atema ni sarasademtsür,” ta lemsatep.