Modi-i Naga Accord temai adoka metetdaktsütsüla:Rahul Gandhi

Imphal, February 28 (Agencies) : Tanü Mongulbarnü linük nung Congress Tatong Tir Rahul Gandhi-i, India Ato Kilonser Narendra Modi-i sign asüba Naga Accord ji temai adoka metetdaktsütsüla, ta ashidang Ato Kilonser-i pa aoba tesem ajak nung kar luja tiyazü jembiba dena aija liasü.
“Centre-i Naga Peace Accord nung sign asü, ajisüaka iba nungji kechi lir ibaji shingaia tejangja memetet. Manipur Chief Minister Okram Ibobi Singh aser state sorkari dena ibaji mejangja. Kechiba Manipur nunger dang Naga Accord nung alibaji miima ayur?” ta Rahul-i Imphal nung election nübuyim sentong ka nung jembidang asüngdang.
“Narendra Modi aolen ajak nung pai tiyazü osang prokoktsür, kar majungba aser adianu tsüngda tsükchitep tendaktsütsü olen jembir. Pai tiyazü tenangzükba agir. Pai Ibobi Singh-i aniba sorkari teraksa bener arur ta tiyazü tongloktsür. Pai teti tiyazü agi shitak küma jembir,” ta pai ashi.
Rahul-i ashiba pusema Ibobi Singh-ia, iba accord nüburtem nem temai adoka metetdaktsütsüla aser aji Internet nung prokshitsüla, ta ashi.
“Naga Accord ajanga state li nung kongshir mekongshirar nüburtemi jangja metettsü atema parnoki (centre) Naga Accord ji website nung inoktsütsü nüngdak,” ta pai adenshia aliba nüburtem dang ashi.
Küm 18 tashi olemtep 80 shi agia aruba sülen August, 2015 nung Naga Peace Accord, koba dang ‘Framework Agreement’ ta ajar iba nung NSCN-IM aser Centre nati sign süa lir. Iba jenjang tashi tongtetba ya 1997 küm ceasefire tezüngzüktep nung sign sütepba ajanga lir.
Tang Manipur Assembly election nung tetsükdaktsü adokbaji Naga Peace Accord ya lir kechiba süra BJP-i state ali tangar nem agütsütsü tashi inyakteper tangbo masü ta ashir ta Congress-i tai tongloktsür.
February 25, 2017 nü Imphal nung nübuyim sentong ka nung jembidang Ato Kilonser Modi-i, Congress sorkari Naga Accord atema tiyazü olulu proker kechiba süra iba accord nung state akoksatsüsa kecha mali, ta Congress aija ashi.
Pai, Ibobi Singh-i aniba sorkarji sorkar ajak dang nungi teraksa tulutiba aketba sorkar lir, ta Ibobi Singh tai tutetja ashi.
Rahul-i, Congress-i aniba sorkari ang Manipur terenlok aser yimjiyimjung leni anitsü, ta ashi.
Centre-i sen melenba indang ashidang Rahul-i, “Demonetisation ajanga linük nung sensakertem kanga timtemer. Iba yagi aluyimertem aser anogo shia aayangertem timtatemba lir,” ta ashi.
Manipur nung Assembly election March 4 aser 8 anogotem nung agitsü sentong lir.