Modi-i nangzükba nung nüburi tamang makateter: Sonia

 Patna, October 03 (Agencies): Honibar nü Congress Tir, Sonia Gandhi-i, Ato kilonser Narendra Modi-i tiyazü nangzükbatem nung nüburtemi tamang makateter, ta ashi.

Bihar assembly election atema Bhagalpur district kübok Kahalgaon assembly constituency nung nüboyim sentong ka nung jembidang lai, “Modi’er yazü tenangzükbatem nung nüburtemi tamang makateter,” ta ashi.

Taruba Bihar assembly election ya ajanga linük nem lenmang tasen ka lapoktsütsü ta shia lai, “Modi-i yazü nangzükbatem kuptoktsü atema tan election nung Congress, JD-U (Janata Dal-United) aser RJD (Rashtriya Janata Dal) teloktep nem vote agüjang,” ta mepishi.

Lai ashiba agi, Ato kilonseri pei linük dang nungibo bendang linüktem nungang mapang timba intoker aser pai tashi aliba lenirtem den ang jungtepner.

“Narendra Modi-i bendangleni kanga oner. Pai nüngtugu nisungtem den azütepner saka sensakertem atemabo mapang magütsüteter,” ta lai aitsü.

“Modi’er sorkari industrialist tem atema dang inyaktsür, iba sorkar ya aluyimer anemer aser sensaker anemer sorkar lir,” ta lai ashi.

BJP-i aniba NDA sorkar maneni aija Sonia-i, lokti nung telemsa adokdaktsürtem sentoktsüla, ta ashi.

Sonia-i, “Bihar ya lenmang tongtibang shimtsü tensa ka nung lir. Iba yagi Bihar aser linük naprong tarutsü tia latettsü, iba lenmangji nenoki shimtsüla,” ta ashi.

Modi’er ita 15 yimsüsübaji linük atema teraksatsüba ka liasü, “Corporates kar dak alaka shinga tajangzük mangu,” ta Congress tongtii ashi.

“BJP’er ita 15 inyakyim ajanga linük mejungi kongshibaji nenok ajaki meteta lir. Mapa manguba taliba kümer masü no, tetsürtem indang senotsü ajemtsür masü no, aluyimertemi züsentetba alang parnok sen angur asü (?)” ta laisa ashi.

Yaküm Lok Sabha aser assembly by election naprongla nung BJP candidate temi tamakok anguba tesem nung nüburtem dang lai, “Nenoki Narendra Modi-i nangzükba nung tamang makatet aser BJP’er mapatongtem magizük,” ta ashi.