Modi-i nübur ashioktsü, pa nem temerenshi agütsütsüla: Ram

New Delhi, October 04 (Agencies): Deobar nü linük nung nüngtugu Lawyer, Ram Jethmalani-i, Ato kilonser Narendra Modi-i India nüburtem ashioktsüogo, anungji pa nem temerenshi agütsütsüla, ta ashi.
Tanü osangbenertem den jembidang taoba mapang Rajya Sabha züngsem Ram-i, pai kar nem vote agütsütsüsa kümra pai JD(U) lenir, Nitish Kumar’er sorkar nem vote agütsütsü, ta ashi.
“Ni agütsütsüsa (vote) kümra ni Nitish’er sorkar nem agütsütsü, kechiyong tamakok anguba ajanga ni Modi jashidaktsüner,” ta Ram Jethmalani-i ashi.
Taküm June ita nung Jethmalani-i Ato kilonser Modi den pilaba sangdonga liasü. Pai Ato kilonser akhümtsübuba tembangogo, ta pai ashi.
BJP MP nungi atsüngdaktsüsang Ram-i mapang ka nungbo Modi Ato kilonser candidate asütsü pusema liasü. Taoba CBDT Mendenbuba KV Chowdary Chief Vigilance Commissioner (CVC) shimba pai anemer.
CVC atema Chowdary shimba tanü Tir-i agizükba sülen pai, tangbo pai sorkar anema Supreme Court nung ken o benoktsü, ta ashi.
“Tangbo onoki Supreme Court aser India nüburtem okadak raratsü. Ni na (Modi) akhümtsübua aliba tanü tembanger,” ta pai Ato kilonser dangi shidi ka züluogo.
Ram Jethmalani-i kasaji twitter ajanga sangdonga, “Ni Ato kilonser Narendra Modi den pilar,” ta ashi.