Mumbai, January 15 (Agencies): Ato kilonser Narendra Modi aija tanü Congress tatong Tir, Rahul Gandhi-i, Modi-i onükbo kanga junga jembir ajisüaka sensakertem tebilemtsü balala atemabo ola madoker, ta aitsüogo.
Hokolbarnü North Mumbai nung party nung inyakertem senden ka nung jembidang Rahul-i, “Onük jembitsübo kanga junger saka sensakertem tebilemtsü atemabo Modi-i ola madoker,” ta ashi.
Rahul-isa party züngsemtem dang, telung nung telemsa madoktsüla aser party tanaben sorkar tashii arutsü atema longjemer inyaktsüla, ta ayongzük.
“Sorkar ka tashi miti akumtsü atema küm ana-asem-pezü agir ajisüaka BJP sorkar kanga kara tashi miti kümdar,” ta Rahul-i ashi.
“Tasen tenzüktsü aser India sentakteptsü atema jembir”. Item o ya junger saka asenok rongnung sensakertem-a lir, ta pai ashi.
“India nung parnok (sensakertem)-a densema lir, sorkari parnok amatokogo. Sensakertemi ajangshiba tia nisung mashi ka dang asüngdangang. Parnok tejashi ashidang parnok ajeptsü. Asenoki sensakertem mesentoktsüla,” ta pai ashi.
Ato kilonser Modi-i ‘India merüktettsü’ indang jembiogo. Modi aser par minister temi ‘jhadus’ maparen tenzüka lenmangtem merükogo saka Mumbai nung jana rüja jenti lir. O jembiba aser sentong ayongzüka akaba ajanga dangbo nai Mumbai memerüktettsü, ta Congress leniri ashi.
Brihanmumbai Municipal Corporation atema senotsü crore merirjang aika lemzükja lir saka Mumbai smart city yanglutsü atema iba sorkari sen crore 100 dang agütsü, ta Rahul-i ashi.
“Onok tashi nung alidang Nanded ama yimti nem onoki sen crore 2,000 agütsü. Mumbai yimti nung terenlok akatsü atema Congress candidate ka Mayor akumtsüla, ta pai ashi.
“Tamasa asenoki Mumbai nung takok angutsü, iba sülen state nung aser tesülen Centre nung sorkar akumtsü,” ta pai shisem.
Iba senden nung Maharashtra Pradesh Congress Committee Tir aser taoba mapang Maharashtra Chief Minister Ashok Chavan, AICC General Secretary Mukul Wasnik, state Assembly nung opposition lenir Radhakrishna Vikhe Patil, Congress MLA Aslam Shaikh aser MRCC Tir Sanjay Nirupam nungeri jembia liasü.
You must be logged in to post a comment Login