Modi-i osangbenertem den senden aka tajungba süla:Congress

New Delhi, June 28 (Agencies) : Linük Ato Kilonser Narendra Modi-i Times Now channel den interview agitsü melena osangbenertem den ang senden ka amen tajungba süla. Times Now den interview agiba mapang pai jembiba meinyaktettsü amai reprangtet, ta congress-i ashi.
“Osangbenertem den senden ka amen asübo osangbener tangar dena tasüngdangba aser telangzüba mapang agitettla. Ajisüaka pai yamaji masü aser yamaji kodanga masütsü,” ta opposition Rajya Sabha züngsem Ghulam Nabi Azad-i ashi.
Times now den interview agiba mapang Modi-i pa jenbu asaa jembi amai reprangtet, ta Azad-i ashi.
“Ni Ato Kilonseri pa jenbu asaa jembiba tanü mezüng angu. April 2014 nung kanga sashia arba molusongzü tanübo molusongzü tambur amai nguogo. Pa kanga tashi mait aser pai jembiba meinyaktettsü amai reprangtet. Ya kanga tejashitsü ka lir,” ta Azad-isa ashi.
Narendra Modi-i kanga bulua jembia aruba, India nunger foreign policy, May 2014 nung National Democratic Alliance sorkari yimsüsü tenzükba sülen kechi jenjang ka tonga lir, ta Congress leniri asüdang.
“May 2014 nung Modi-i pa Ato Kilonser atema tenangzükba agiba mapang Pakistan nungia Ato Kilonser Nawaz Sharif jaok. Pai Sharif den onük aika rasaa jembiogo. Pai Lahore-a semdangogo ajisüaka iba melena asenok küm ana tsüngda kechi ajangzük? Jammu aser Kashmir nung tesamar aliba kiralongrartem taliang tashi taitba küma tesüiba küm 60 nung atalokba lendong dang nungi tamajungba ataloka yimjung mokonga kümogo,” ta Azad-i ashi.
Pakistan nung tashi amshir telok aika lir aser ibaji tebilemtsü tulu, ta Modi-i tanü interview nung Pakistan atema jembidang ashi.