Modi-i PM office jenjang atsüzüktsüogo: Congress

New Delhi, February 26 (Agenices): Taoba Deobarnü Ato kilonser, Narendra Modi-i election nüboyim sentong ka nung jembidang, yim ka nung leper yanglutsü atema senotsü ngura, tasümang arongba tesem yanglutsü atema-a senotsü angutsüla, aser Ramzan benjung nung power supply methitmi agutsüra Holi benjung nunga kasaji asütsüla, ta jembiba aija tanü Congress Party-i, pai tematiba office akhümket jenjang atsüzüktsüogo, ta ashi.
Tanü New Delhi nung osangbenertem den jembidang Congress lenir, Manpreet Singh Badal-i, “BJP (Bharatiya Janata Party)-i Uttar Pradesh assembly election nung tamakok angutsü ta meteta lir, ibayongji Ato kilonser Modi-i ‘leper aser tasümang arongba ki’ aser Ramzan (Muslim nunger benjung) o Diwali (Hindu benjung) na indang jembiba ajanga telemsa adokdaktsütsü meranger,” ta ashi.
“Ato kilonseri pa menden akhümket metettsüla. Item ama ojang amshiba ajanga pa iba menden atema metemsü ta kuli sayur. Atangji nung Modi-i Prime Minister’s office akhümket menden jenjang atsüzüktsüogo,” ta Badal-isa ashi.
“Item ojangji India yangerba ojangtem masü. Iba linük ya naro aika apongba linük ka lir. Modi-i Ato kilonser ama benshitsü mapang tongogo,” ta Congress lenirisa ashi.
Modi sorkar kümsük tesadang shi (küm 2 ser tesadang) jungaka parnoki Lok Sabha election mapang nangzükbatem atema meinyaker ta aija Congress leniri, “Scheme temji yimyim dang kümogo. Nangzükbatemji o kija kümogo,” ta ashi.
Centre indang ‘Startup India’ scheme aija Badal-i, Modi sorkari company tem dang sen crore 10,000 nangzüka liasü saka sen crore 5.66 dang agutsü, ta metetdaktsü.
BJP-i aluyimertem dang production cost dak alia support price shilem 50 agutstsü nangzük, ajisüaka parnoki ibaji magizük, ta pai ashi.
“Parnoki tashioktsüba mapa inyaker aser tang election agiba state pongu nung parnoki terenlok onük jembitsü madoker,” ta paisa shisem.