Modi-i scientists nem tenüngsang agütsür

New Delhi, February 28 (Agencies) : Küm shia India nung February 28 nü National Science Day amunger aser iba ya 1928 küm Indian physicist, Sir Chandrasekhara Venkata Raman-i Raman Effect purapitetba atema pa nem tetushi agüja amunger.
Sir Venkata Raman-i Raman Effect purapitetba sülen nungi Indian scientific community-i linük renlokdaktsütsü atema kanga dang meranga inyaka arur.
Scientist temi bendanga agüja mapa inyakba atema tanü National Science Day nung Prime Minister, Narendra Modi-i scientific community nem tenüngsang agütsüogo.
Linük yangerba mapa nung scientist-i shilem tajung agiba atema Modi-i pelaba ashi aser iba dak sendakba nung pai CV Raman nem tenüngsang agütsü.
“National Science Day nung ni scientific community den salem abener aser moatsür. Parnoki linük yangerba mapa nung shilem tajung agiba atema kanga pelar” ta pai Twitter nung metetdaktsü.
“Asenoki Sir CV Raman nem tenüngsang agütsür, pai science nung mapa tajung inyakba ajanga tanü tashi science sapurtem ajungmesor” ta Modi-ia ashi.