Modi-i sepai ketdangsertem den jembi

Dehradun, January 22 (Agencies): Deobarnü Ato kilonser, Narendra Modi-i sepai tongti ketdangsertem senden ka nung jembi, aser iba mapang nung pai sepai ketdangsertem dang, tang linük nung security tayongzükba balala atema pa mangdang lemsatep, ta osang angazüker.
Tanü Dehradun nung aliba Indian Military Academy (IMA) nung ayongba Combined Commanders Conference nungji Union Defence Minister, Manohar Parrikar aser National Security Advisor, Ajit Doval nata dena liasü.
Tamalen ama masü, saka takümbo iba senden nung sorkari sangdong kecha magütsü, kechiyong state pongu- Uttar Pradesh, Punjab, Goa, Uttarakhand aser Manipur nung assembly election agitsü aliba nung ajemdaker Election Commission-i model code of conduct benoka tenokdangba kar agüja lir.
Yaküm Army, Navy aser Indian Air Force nung tongti asem shimba sülen par asem atemabo tan ya mezüngbuba conference lir.
Iba conference ya shitakba agibo yaküm küm tatemlen China arrtsülen North East nung ayongzüka akatsü sentong liasü, saka kuli balala aika ajanga iba senden makatet.
Chiefs of Staff Committee Chairman aser Navy Chief Admiral Sunil Lanba-i presentation ka agüja iba conference tenzük, iba sülen IAF aser Army chief-ia presentation agütsü.
Yashi Election Commission-i tetuyuba ka ajanga, Modi-i official semdangba dak alia, state pongu nung assembly election nung vote agütsütsüpurtem kongshitsüsa tanga lokti senden kecha makatsüla, iba dak aliba osangbenertem senden, sangdong mesüra temetetdaktsüba kecha magütsütsüla ta tenokdangba agüja liasü.
Congress-i Election Commission dang, BJP-i iba conference ji maongka agitsüa akok, ta tamalen shia liasü.