Modi-i Shashi Tharoor nem tenüngsang agütsü

New Delhi, July 23 (Agencies): Yashi Congress tongti lenir Sonia Gandhi-i Congress MP Shashi Tharoor dang tekümdangtsü o shia arrja liasü saka tanü Ato kilonser Narendra Modi-i pa (Tharoor) dak lokti nung jembitsü sempet aliba asoshi tenüngsang agüja jembiogo.

Lok Sabha MP tem asoshi Speaker-i ayongzükba sentong ka nung Congress nungibo Tharoor dang liasü, aser Modi-i pa nem tenüngsang agütsüogo.

Speaker-i ayongzükba Speaker’s Research Initiative (SRI) sentong nung jembidang Modi-i, “Oxford nung o toktepba/atsütepbaji mamatettsüsa lir. Iba sentong nung Shashi adenbaji junger. Pai jembiba oji ajanga India sensotem tangatetba sayur,” ta ashi.

Ano Congress asoshi tejashitsü osang kaji Lok Sabha Speaker Sumitra Mahajan-ia Tharoor tenüngsanga, Oxford University nung pai jembiba oji ajaki melung asür, ta ashi.

“Nai (Tharoor) nü melungjang taroktiba nungi jembiogo,” ta lai ashi.

Modi-i ashiba agi, UK-i küm 200 tashi India yimsüsüba atema Tharoor-i UK dang sen temenok khanga jembi aser pai jembiba video ji Youtube nung ayimsünga prokshidagi.

Taoba mapang nunga Tharoor-i BJP mapatong aser Modi aiben tenüngsanga jembiogo, aser iba yongji pa Congress otongdar menden nungi agienatok.

Ato kilonser Modi-i ‘Clean India’ campaign nung adentsü asoshi pa jaoka liasü aser pai ibaji agizük, iba den külemi Modi’er yoga atema-a pai Modi tenüngsanga jembiogo.