Modi-i tamakok nguogo: Manmohan Singh

New Delhi, Mongputeni (October) 26 (Agencies): Prime Minister Narendra Modi-i nübortem tsüngdang tamakok nguogo aser pa nem vote agütsür tamang samatsüogo ta Hokolbarnü Manmohan Singh-i ashi.
Congress lennir Shashi Tharoor-i züluba ‘The Paradoxical Prime Minister: Narendra Modi and His India’ kaket sayaba sentong nung jembidang Manmohan-i Bharatiya Janata Party (BJP) lennir Modi aitsü.
“Tesüiba küm pezü tsüngda Modi aser par sorkari nübortem tsüngdang tamakok nguogo aser vote agütsürtemi tamang akaba samaogo. Modi-i pa India nunger ajak atema Prime Minister ta jembi saka kin o kin tashiyim mapa inyakdang, loktii nisung tepsetba aser nashi kümzükertemi ozüng alema inyakba tatalokbatem nung pai ola madok” ta taoba prime minister-i ashi.
Linük nung Central Bureau of Investigation (CBI) ama tongtipang rejutem tashimait kümdaktsür, ta Manmohan-isa Modi dak ajemdaker olen ka jembi.
Prime Minister aser Centre nung NDA sorkari totzü jenjang atuba aser rongsenkettsüng tsütsü tensa mejungi kümdaktsüba atema paisa aitsü.