Modi-i tesempa proker: Sonia

Barpeta, April 07 (Agencies): Tanü Congress Tir, Sonia Gandhi-i, Ato kilonser Narendra Modi-i linük nung tesempa prok-aka bendanglen semdangba mapang nungbo pai tululu jembir, ta aitsüba den külemi Assam nung vote agütsütsüpurtem dang, Nagpur nungi tashi amshia telemsa adokdaktsüba BJP nem vote magütsütsüla, ta ashi.

Tanü Lower Assam, Barpeta district kübok Sarukhetry nung election nüboyim senden ka nung jembidang Sonia-i, “Kodang pa (Modi) bendangleni odir pai ajak azüiter aser linük indang o tululu jembir, ajisüaka linüki meyipa aruba sülenbo pai tesempa prokba nung shilem agir,” ta ashi.

“Tamangba ajanga telemsa adokdaktsüba lendong Assam nung lir, kechiyong BJP-i telemsa proker aser mapang talangka temeim, yimjung aser tesünep aginüa aliba lokti nung nung telemsa adokdaktsür,” ta Sonai-i ashi.

“Sankardeva aser Azaan Fakir nunger tesayuba sülen nüburtem anidaka Assam ya tesünep tatishitsü tajung ka lir. Modi aser par minister temi state nung yazü tenangzükbatem nangzüker aser nübur tsüngda telemsa adokdaktsür,” ta lai ashi.

“BJP indang telemsa adokdaktsüba mapatongji Nagpur (RSS headquarters) nungi azüoker aser iba ya democracy atema lendong tulu lir,” ta Congress Tiri ashi.

Lai ashiba agi, Congress indang terenlok sentong nung party-i tamangba yimsü aser kin ajak züngoker.

“Congress-i telongjem atema inyaker aser BJP-i loksadaktsütsü atema inyaker,” ta lai ashi.

“Ato kilonseri asenok ola nembangtsüner aser linük Temzüng aitsüba manener. Pai asen linük sobalibatem amatokogo,” ta lai ashi.

Küm 15 tejaklen Assam nung tetsübu aser rara liasü, ajisüaka Chief Minister Tarun Gogoi aser par minister temi tesünep, terenlok aser azükaru alitsü atema kanga meranga inyak, ta Gandhi-i ashi.

Ano Jagiroad nunga election nüboyim senden nung jembidang Sonia-i, “Narendra Modi Ato kilonser akumba sülen asen lanurtem aser aluyimertem soseta asür. Asen adianu aluyimertem teyari atar. Iba ya temelenshi asü (?)” ta asüngdang.

Assam dak sentakba nung lai, “Modi-i Special Category State status (loan/grant ratio of 10:90) agientsüogo. Iba ya Modi-i Assam nüburtem ashioktsüba tulutiba lir,” ta ashi.