Modi-i timtem adokdaktsürtem azüoktsüla: Amjad Ali Khan

Lucknow, November 01 (Agencies): Tanü Sarod kongki atemer mongin, Ustad Amjad Ali Khan-i, award meyipa agütsür kaket ken o zülurtem aser artist tem ya ‘sowar’ masü saka linük nung aliba tensa atema mepelartem lir, aser iba tensa raksatsürtemji Ato kilonser Narendra Modi-i azüoktsüla, kechiyong pa dak tamang teimla tulu lir, ta ashi.
“Tang linük nung atalokba ya temelung ashitsüka lir. Yashi ni Narayanmurthy interview agiba reprangogo aser pai-a tebilemtsü kanga kaa jembiogo. Atangji tensa ya süngjemabo mali. Modi-i mapa aika inyakner, ajisüaka pa meketa nisung kar lir, aser parnok jagi pei melungjangi bilema aruba ajak jembir aser parnoki inyaknüba ajak inyaker,” ta Khan-i Lucknow nung osangbenertem dang ashi.
Paisa, “Modi-i item ama nisungtemji azüoktsüla, aji oda mesüra yimjung atema amokmeren tulu lir. Modi dak tamang tulu ayur,” ta ashi.
Kaket ken o zülurtem, sangro zülurtem aser artist temi award meyipa agütsüba dak sentakba nung tasüngdangba ka langzüdang Padam Vibhushan award angusang Khan-i, “Parnoki tang tensa indang tebilemtsü akar, iba yongji parnoki award meyipa agütsür. Pei tebilemba sadoka jembitsü asenok dak temeten lir. Iba ya langka nung tai lir ama reprangteter,” ta ashi.
Iba tensa ya Modi’er sorkar tashii maruba mapang nunga liasü asü (?) ta asüngdangba langzüdang pai, “Kaket keno zülurtemi tang ang award meyipa agütsür,” ta langzü.
“Parnok ya sorwar masü. Parnoki tebilemtsü akaba temaitsü sayua award meyipa agütsür. Iba ya kechiba ataloker ta sorkari shisadangtsüla,” ta paisa ashi.
Pai-a award meyipa agütsütsü asü ta asüngdangba langzüdang pai, “Tangbo ni tensa ya dang repranga atadar,” ta ashi.