Modi-i TN nung project aika tenzüktsütsü

Chennai (Tamil Nadu), February 09 (Agencies): Deobarnü Ato kilonser, Narendra Modi-i Tamil Nadu (Tiruppur) semdangtsü aliba atema Tamil Nadu nung Bhartiya Janata Party (BJP) unit renemshidar, ta tanü party lenir kati metetdaktsü.
2019 küm atema Parliament nung interim budget benokba sülenbo tang mezüng pai Tamil Nadu semdangtsü.
Osangbenertem den jembidang Tamil Nadu nung OBC Morcha Tir, S.K. Kharventhan-i, “Sorkar sentong ka nung adenba sülen Modi-i lokti senden ka nung jembitsü; iba sentong nung nisung 150,000 shi adentsü imlar. Pai party züngsemtem aser Lok Sabha constituency tenet– Ooty, Coimbatore, Pollachi, Erode, Karur, Tiruppur aser Salem nungi nüburtem den jembitsü,” ta metetdaktsü.
Paisa, iba senden nung Finance Minister Piyush Goyal aser Minister of State for Finance, Pon Radhakrishnan nata adentsü, ta metetdaktsü.
Lokti senden metenzükdang Modi-i Tiruppur kübok Perumanallur yimdak terenlok project aika tenzüktsütsü.
Tiruppur nung Modi-i yipden 100 aliba Employees’ State Insurance Corporation (ESIC) health facility yanglutsü atema lung azüngtsütsü. ESIC ajanga süoshi yangluba jila nung mapa inyaker 100,000 aser parnok kibongtem ayimjemtsü.
Ato kilonserisa Trichy Airport nung integrated building atema lung azüngtsütsü aser Chennai airport modernization atema lung azüngtsütsü.
Modi-isa yipden 470 aliba ESIC Hospital aser Bharat Petroleum Corporation Ltd indang Ennore Coastal Terminal semzüktsütsü.
Pai Chennai Port nungi Chennai Petroleum Corporation Limited’s (CPCL) Manali Refinery tashi crude oil pipeline semzüktsütsü.
Iba dak alia Modi-i AG-DMS Metro station nungi Washermenpet Metro station tashi passenger service Chennai Metro Rail semzüktsütsü.