Modi-i Vietnam, China semdangtsü

New Delhi, Sept. 01 (Agencies): Ato kilonser, Narendra Modi-i Vietnam semdangtsü atema Hokolbarnü New Delhi nungi apusoa aotsü  aser China, Hangzhou nung G-20 senden nung anogo ananü adentsü.
Modi-i Vietnam mezüng semdangtsü, aser iba nungjagi August 3 nü pa Hangzhou-i oa September 4-5 anogotem nung G-20 senden nung adentsü.
September 5, 2016 nü Modi India-i meyipa aruba sülen ano India-ASEAN aser East Asia Summits nung adentsü atema Laos-i aotsü.
Vietnam nung Modi-i par linük lenirtem den defence, security aser shishilembaba nung linük ana tesendaktep tajungba akumtsü atema jembiba den külemi India-i par linük nung totzü bushiba maparen indang jembitsü.
India’er ONGC Videsh Limited-i küm 30 dak tema Vietnam nung oil exploration projects inyakdar aser Modi-i iba linük semdangba mapang iba sector nung project tasen aika sangdongtsüa akok.
G-20 Summit nung India-i kiralongrartem senotsü anguba lenmangtem nokdangtsü onük aser saru magütsüba onük süoka jembitsüa akok.
“G-20 senden mapang Modi-i China Tir, Xi Jinping den jurila senden ka amentsü aser BRICS lenirtem senden nung adentsü,” ta Ministry of External Affairs Secretary (West),  Sujatha Mehta-i osangbenertem dang ashi.
Laisa, G 20 senden nung kiralongrartem senotsü lenmang nokdangtsü atema onük benoka jembitsü, ta ashi.
Iba dak alia kasa senden nung saru dak sentakba osangtsüsang lemsateptsü aser alima rongsenkettsüng jenjang ajema akumba indanga jembitsü.