Modi-i Xi den ajurutepba ajanga India-China tesentaktep akangshitsü

Qingdao, Aami (June) 9 (Agencies): Küptoknü (Honibar) Prime Minister Narendra Modi-i China Tir Xi Jinping den ajurutepa senden ka amendang onük aika benoka jembiogo aser India-China tesentaktep tali akangshitsü ta Modi-i ashi.
Wuhan summit nung Modi aser Xi na ajurutepba sülen hopta trok shi lir tena tanaben ajurutep aser tanü tenati taoba mapang benoka jembiba onüktem meyipa reprangshi aser linük ana tsüngda tesentaktep akangshitsü indang jembi.
Asüng Shanghai Cooperation Organisation (SCO) summit alitsü aser iba jakdang Modi aser Xi na ajurutep.
“Tanü nikongdang SCO host, Tir Xi Jinping den ajurutep. Künati linük ana aser alima dak sendakba onük aika jembiogo. Küna olemtepba ajanga India-China tesentaktep tali akangshitsü” ta Modi-i Twitter nung metetdaktsü.
Sendenji kanga junga menogo ta External affairs ministry otongdar Raveesh Kumar-i ashi aser külen India dangi Chinese ambassador Luo Zhaohui-ia lennir anati “Wuhan consensus” dak rangloker olemtep aser tarutsü Sino-India tesentaktep ajungtsü atema sentongtem renem ta metetdaktsü.
Tanü senden amenba sülen China-i India nem Brahmaputra ayong indang hydrological information lemsateptsü indang MoU ka nung sign asü aser India nungi China dangi non-Basmati rice dena jang ayoktsü indang tenangzüktep ka agi.
“Wuhan informal summit nung tesentaktep yanglushiba akangshitsü atema PM Narendra Modi-i SCO Summit jakdang China Tir Xi Jinping den ajurutep” ta Kumar-i metetdaktsü.
Wuhan nung senden amenba sülen Modi aser Xi nati tarutsü nung linük ana tsüngda Doklam tensa ama majurutsü atema sepaitem len anitsü aser osang tongteprateptsü atema telemtetba agi.
Lennir anati rongsenkettsüng tesentaktep akangshiba den people-to-people tesentaktep tajungba kümdaktsütsü atema tebilembatem lemsatep.
Tesüiba küm 4 tsüngda Modi aser Xi na senden 14 ben menogo, ta Luo-ia ashi.
Yaküm Doklam tekong merangtepba tensa sülen India aser China tsüngda tesentaktep mejungi aküm.
UN nem Pakistan nung amenoka aliba Jaish-e-Mohammed tanishir Masood Azhar mokdangdaktsütsü atema atema India-i merangba China-i noktang aser ano Nuclear Suppliers Group nung India züngsemtsü merangba anema China-i noktakba onüktem ajanga linük ana tsüngda tesentaktep kanga mejungi kümer liasü.
China-i Belt and Road Initiative nung Pakistan-i agia aliba Kashmir süira noktangtsü ta India-ia anema apuso.
Taoba hopta tu Modi-i “India aser China na tamang katepba aser temulung lemtepa külemi inyakra Asia aser alima asoshi tarutsü tajung ka asütsü” ta metetdakja liasü.
Paisa ashiba agi “Asia of rivalry” ajanga asenok tejakleni moutettsü aser ‘Asia of cooperation’ ajanga dang tang putu tia yangertsü.
Singapore nung Shangri-La Dialogue mapang Modi-i jembiba onükji China-i pela agizük.
Taoba hopta South Africa nung BRICS Foreign Ministers senden amendang Chinese Foreign Minister Wang Yi-i External Affairs Minister Sushma Swaraj dang Modi-i jembiba onük China-i pela agizüker ta osang metetdakja liasü.
Shanghai Cooperation Organisation (SCO) nung linük 8 züngsema lir aser iba telok nung alima nütsüng yongsük nungi shilem 42 aser global GDP nung 20% dena lir.
2005 nungi India ya observer ka ama liasü aser ministerial-level sendentem nung denyonga aru.
SCO ya 2001 küm tentet aser mapang kabo China-i NATO alliance den tokteptsü atema tentetba liasü ta bilem.
India aser Pakistan linüktem June 2017 nung ang SCO nung full member states ama züngsema liasü.