Modi indang degree kulikaketji shitak:Delhi University

New Delhi, May 10 (Agencies) : Delhi CM Arvind Kejriwal aser AAP lenirtemi India Ato Kilonser Narendra Modi indang BA degree kulikaketji tiyazü ta shia reprangshitsü ashiba sülen Delhi University (DU)-i kanga junga reprangdanger Mongulbarnü pa indang kulikaketji shitak lir, ta metetdaktsüogo.
Delhi University-i, Modi indang BA degree kulikaket dak sentakba nung nüngdakba record ajak lir. Ajisüaka aibelenang tila ka lir kechiba süra pa 1978 küm degree angu sür nung record nung 1979 ta zülua lir, ta metetdaktsü.
“Onoki pa azüngba aser pa degree anguba record ajak reprangdangogo aser iba mapang asen Ato kilonser indang degree ji shitak ta kuli ngutetogo. Pa 1978 küm BA tatidang agütsü aser 1979 küm degree ji agütsü,” ta Delhi University nung registrar Tarun Das-i ashi.
AAP lenir telok kati university office-i oa Modi indang degree ji shitak asü masür reprangdangba sülen DU-i iba osang tejangja ya agütsü. Parnok danga Bodhbarnü arua reprandangang ta shiogo.
University nung ketdangsertemi Aam Aadmi Party lenir rongnung Ashutosh, Sanjay Singh, Dilip Pandey aser Ashish Khetan nungerbo vice-chancellor (VC) den majurutepdaktsü.
“Ibai Ato Kilonser ka indang degree reprangdanger aser iba osang tejangja agütsütsüji VC ka map lir,” ta AAP lenirtemi ashi.
Parnoki DU semdangba mapang police duty kanga sashia liasü.
Hombarnü BJP Tir Amit Shah aser finance minister Arun Jaitley nati Narendra Modi indang BA aser MA degree indang kuli kaket Delhi chief minister Arvind Kejriwal dang sayua pa teyazü jembiba tuteta ashi.
Ajisüaka iba mapang Shah aser Jaitley nati sayuba kulikakettemji teyazü ta Kejriwal ashi.