Modi indang degree osang Kejriwal nem agütsütsü CEC-i tuyuogo

New Delhi, April 29 (Agencies): Hokolbarnü Central Information Commission (CIC)-i Delhi University aser Gujarat University na dang Ato kilonser, Narendra Modi-i anguba degree osang bushir Delhi Chief minister, Arvind Kejriwal nem agüjang, ta tuyuogo.
Information commissioner, M Sridhar Acharyulu-isa Prime Minister’s Office dang University ana nung jagi Modi-i kwi küm kechi degree angu’ar ibaji bushiang ta tuyu.
Delhi University-i, kaketshir ka indang roll number magütsüra, item osang angutsüji kanga tasak ta shiogo.
“Election nung tokteptsü atema shisaliok (degree) malibaji India nunger democracy nung tongtibang rongnung ka lir. Degree masü saka shisaliok nüngdaker. Ajisüaka Chief Minister menden nung amener senso kati (Kejriwal) Ato kilonser dak sentakba degree osang metetnüra, iba osangji agütsütsü tim,” ta Acharyulu-i tetuyuba agütsüba nungji shia lir.
Yashi Kejriwal-i shidi ka ajanga CIC-i Ato kilonser indang degree mimbangtsü meranger, ta shia liasü. Kejriwal-i shidi ajanga Acharyulu dang, “Kü indang osang yimjak nung sangdongtsü ni mashishir. Ajisüaka nai Narendra Modi indang degree osang miimshiba ni metetogo. Linük nübur ajaki ochiji metetner. Ajisüaka pa indang degree osang tejangja nai sangdongtsü memulunger. Kechiba nai yamai inyaker (?) Iba ya tim masü,” ta shia lir.
2014 Lok Sabha election nung Modi-i pa Delhi University nungi BA degree anguba aser Gujarat University nungi Master degree anguba shia lir.