Modi, Jayalalithaa, Russia Tir Putin-i Kudankulam Nuclear plant lapoktsü

August 10, 2016 nü Ato kilonser, Narendra Modi, Russia Tir, Vladimir Putin aser Tamil Nadu Chief Minister, J Jayalalithaa nunger külemi Tamil Nadu nung Kudankulam Nuclear Power Plant video conferencing ajanga lapoktsüdang agiba noksa angur.

Kudankulam/New Delhi, August 10 (Agencies): Bodhbarnü Ato kilonser, Narendra Modi, Russia Tir, Vladimir Putin aser Tamil Nadu Chief Minister, J Jayalalithaa nungeri külemi video conferencing ajanga Tamil Nadu, Tirunelveli district kübok aliba Kudankulam Nuclear Power Plant lapoktsüogo.
Iba sentong nung jembidang Modi-i, “India aser Russia tsüngda putisütsü tesentaktep yangluba nüngtem nung Kudankulam nuclear power plant lapoktsür,” ta ashi.
“Tanü anogo ya India aser Russia nungi engineer tem atema tepelatsü anogo ka lir, parnoki meranga inyakba atema tetushi agütsür, parnoki meranga inyakba mapa ajanga süngjang tajung tangtsüogo,” ta Ato kilonserisa ashi.
KNPP nung ano units pongu, unit shia 1,000 MW amenoktsü, ta paisa metetdaktsü.
Ano Russia yimtiba, Moscow nungi Tir Putin-ia, iba sentong ya ajak atema lir, ta ashi.
“Iba power plant ya Russia nunger technology tasentem ajanga yanglu. Nuclear technology tsütsü alima lenirtem rongnung Russia densembaji meteta lir aser onoki ozü technology tepela nung India tembartem den lemsateper,” ta ashi.
Maneni Chennai yimti nungi Tamil Nadu Chief Minister, Jayalalithaa-i, “KNPP (plant) ya India aser Russia tsüngda mapang talangka nungi tesentaktep tajung aliba temaitsü sentong ka lir. Ni küm 10 office nung ali piyong Tamil Nadu, Tirunelveli district, Kudankulam nung iba project inyakbaji ni nungita liasü, iba den külemi nüburtem melungjang nungi tetsübu aliba ajema kümdaktsütsü merangogo,” ta ashi.
Tamil Nadu Chief Minister-i ashiba agi, nuclear plant amenokba ajanga lendong ataloktsü südi ta nüburtemi tetsübu nung iba project anema nokdakba ajanga mezüngbuba unit menua tenzük, ibayongji lai Central sorkar den külemi iba atemaji inyak.
Mezüngbuba Kudankulam nuclear power plant unit ya 2013 July nung tenzük aser tang tashi nung iba unit nungi power 10,800 million units adokdaktsüogo.
1988 küm November ita nung India Ato kilonser, Rajiv Gandhi aser Russia lenir Mikahil Gorbachev na tsüng tezüngzüktep ka agiba sülen 1,000 megawatt Kudankulam nuclear power plant ya Russia mongintem teyari ajanga yanglu.