Modi-ji BJP indang masü saka India indang PM

Chandigarh, August 26 (Agencies): Okadaki Gurmeet Ram Rahim aitsüba sülen pa sülen anidakertemi ozüng alema mapa inyakba atema Honibarnü Punjab and Haryana High Court-i Haryana aser Centre sorkartem artsü aser idangji “Narendra Modi-ji BJP indang Prime Minister masü saka India indang lir” ta ashi.
Centre tenüng nung okatsür Additional Solicitor General Satya Pal Jain-i yashi atalokbaki state indang tebilemtsü lir ta ashidang, High Court-i Haryana ya India kübok shilem ka masü na? Kechiba Punjab aser Haryana na tangar dang nungi balaka amshir? ta asüngdang.
Haryana nung ML Khattar-i aniba BJP sorkar dang High Court-isa “yimten tsütsü ajangzüktsü atema kechiba nenoki Panchkula ama yimti rongdokdaktsü?” ta asüngdang.
Yashi CBI okadak kati Ram Rahim aitsüba sülen pa pusemer nisung meyirjang aika Panchkula nung okadak anasa adenshi aser parnoki tejashi nung garitem nung mi senoktsü, kiojentem raksatsü aser nisungtem yirutsü.
Iba inyakyim ya Haryana nung tanga tesemtem aser Punjab kübok tesem kar nunga raloka oa inyak.
“Nenoki tensa mejungi kümdaktsü. Nenoki iba tensa adokdaktsü. Iba onük atema nenoki Panchkula nungi DCP tila ka kangki nung metatsü meranger, saka mashileni aniba yimten yimsüsürtem kechiba memerenshir” ta obendangertemi Haryana sorkar dang ashi.
Honibarnep state sorkari Panchkula nung police ketdangser ka mapa nungi anentsüba nung ajemdaker High Court-i iba olen jembi.
Telok aika mesenteptsü tenokdangba agüja liaka, Ram Rahim-i aniba Dera Sacha Sauda züngsem lakh 1.5 shi jungnüa Panchkula nung adenshidaktsüba atema Haryana sorkar dak tai tongloktsür.
Ano külen, Hombarnü CBI Judge Jagdeep Singh tayimtsü ajanga Rohtak nung aliba Sunaria jail-i anir aotsü aser idakji Gurmeet Ram Rahim Singh nem temerenshi agütsüba osang metetdaktsütsü.
Sorkar dang jail nung security arrangements ajak inyaktsü aser Jagdeep Singh den par staff ana atema tayimtsü anepalutsü tetuyuba agütsüogo.