Modi ket nung CBI lira onok ket nung RTI lir: Sisodia

New Delhi, February 10 (Agencies): Hokolbarnü Delhi Deputy Chief Minister, Manish Sisodia-i Ato kilonser, Narendra Modi indang digital aser tanga social media campaign nung intokba senotsü osang tejangja metettsü atema RTI ka benokogo.
Aam Aadmi Party (AAP) lenir, Manish-i, Modi’er sorkari Delhi sorkar anema osangtem agitsü atema Central Bureau of Investigation (CBI) amshiba ajanga pai-a RTI ajanga osangtem bushir, ta ashi.
Tanü New Delhi nung osangbenertem den jembidang Sisodia-i, “Modi ket nung CBI lira onok ket nung RTI (Right to Information) lir,” ta ashi.
Taoba ita CBI-i “Talk to AK” social media campaign nung ochimashi lir ta shia Sisodia anema bushisüngdangtsü benoka liasü.
Deputy Chief minister pusema Delhi Chief Minister, Arvind Kejriwal-i, CBI-i Modi anema-a bushisüngdangtsüla, ta ashi.
“Prime Minister’s Office-i digital advertisements atema contract agütsüba ama Manish (Sisodia)-ia advertisements agütsü,” ta Kejriwal-i twitter ajanga ashi.
“Modi-i Manish anema CBI nem bushisüngdangdaktsür, anungji kasa agency-i pa (Modi) anema-a bushisüngdangtsüla,” ta paisa ashi.
RTI nungji Sisodia-i Make In India, Namo App, Start-up India aser Digital India atema Centre sorkari social media advertisement contracts agütsüba indang osang tejangja asüngdanga lir.
“Social media nung advertisements ji credit cards ajanga agütsütsüla, aser credit limit lir. Item advertisements atema Modi’er sorkari koba credit card amshi?” ta Deputy chief minister, Sisodia-i asüngdang.
“Kodang onoki nüburtem onük jembidir, ibaji ochimashi ta aitsür, ajisüaka kodang pai (Modi) jembidir ibajibo linük meimba lir. Kechiba ibaji bendanger?” ta paisa asüngdang.
Sisodia-i ashiba agi, Modi ket nung CBI aliba ajanga Delhi sorkar file tem apu süra Prime Minister’s Office file tem jangjatsü atema pai RTI ajanga inyaktsü.
“Onoki file anapronglaji nübur tsüngdang sangdongtsü aser nübur senji shirnoki timi amshir aser shirnoki meshitaki amshir’ar ibaji nüburtemi lemtettsü,” ta paisa ashi.