Modi kübok Swiss banks nung India nunger sen timba kümogo: Rahul

New Delhi, Aami/June 29 (Agencies): Swiss banks nung India nunger sen timba-timba rizüngba nung ajemdaker tanü Congress party Tir, Rahul Gandhi-i Ato kilonser, Narendra Modi aitsü.
Ato kilonseri, Swiss banks nung India nunger sen rizüngba shilem 50 agi timba akumbaji ochi sen lir, saka ochimashi sen mali, ta jembia liasü.
Rahul-i twitter ajanga, “2014 küm pai (Modi): Ni Swiss Banks nung aliba ochimashi sen ajak bener arutsü aser India nunger bank account shia sen lakh 15 inoktsütsü ta nangzük. 2016 küm pai: Demonetisation ajanga India nunger ochimashi sen nungi taneptsü angutsü ta jembi. Ano 2018 küm nungbo pai: Swiss Bank nung India nungeri rizüngba sen shilem 50 ji ochi sen, Swiss Banks nung ochimashi sen mali! (sic), ta jembir,” ta aitsü.
2017 küm Swiss banks nung India nungeri sen rizüngba shilem 50 agi timba aküm- sen crore 7,000.
Congress-i twitter ajanga, “Dr. Manmohan Singh yimsüsüba mapang nung Swiss banks nung sen rizüngba ajema akum, saka Ato kilonser Modi mapang nung timba akumer. Demonetisation sülen shilem 52.2 agi timba akumbaji 2004 küm sülenbo timtiba rizüngba lir,” ta ashi.
Congress otongdar, RPN Singh-i, “Ato kilonser Modi-i ochimashi samatsütsü aser ochimashi sen meyipa bener arutsü ta nangzükba tu koda asü?” ta asüngdang.
Paisa BJP dang, bendanglen ochimashi sen 80 lakh crore rizünga aliba bener arutsü aser bank account shia nung sen lakh 15 inoktsütsü ta nenoki nangzük, ajisüaka Modi-i bank account shia sen lakh 15 inoktsütsü melen Swiss banks nung India nunger sen rizüngba shilem 50 agi timba kümogo, ta aitsü.
Swiss National Bank (SNB) official data tawa sangdonga liasü, aser iba osang nung Swiss banks nung India nunger sen ano timba rizüngba ya ajanga India nungeri bendanglen sen rizüngba nung ano taliba melung malemtsüsa kümogo.