Modi-Mamata tezüngzüktepji Bengal atema lendong lir: Sonia

Canning (West Bengal), April 26 (Agencies): Hombarnü Congress Tir, Sonia Gandhi-i Ato kilonser, Narendra Modi aser West Bengal Chief minister, Mamata Banerjee nati yazü nangzüker ta aitsüba den külemi “Modi-Mamata tezüngzüktepji” state aser democracy naprong atema lendong lir, ta ashi.

Assembly election atema South 24 Parganas district kübok Canning nung nüboyimba mapang Sonia Gandhi-i, Trinamool Congress tongti, Banerjee-i “Terenlok katsüogo ta o tululu jembir,” ta aitsüba den külemi state nung terenlokji mapa manguba, aluyimeretm soseta asüba aser tzüzüng-ozüng mebenoktetbatem lir, ta ashi.

“Trinamool-i parnoki election mapang nangzükbatem ajak amatokogo, aser tang parnoki terenlok atema inyakba indang jembir. Ajisüaka nenok jakdang atangji jungkai adoka lir. Terenlok lira kechiba industry shibanger, kechiba aluyimertem soseta asür aser kechiba mapa manguba tebilemtsü lir(?),” ta Congress tongti Gandhi-i asüngdang.

“Industry tem shibangdar, tzüzüng ozüng temaitsü mali, tetsürtem anema inyakba ken o jenti lir, ochimashi jenti lir aser apu tasen-a chirepdar,” ta laisa ashi.

Sonia-i Bengal nung ‘Hilsa’ ango tatishitsü amshia Banerjee aser Modi naprongla aitsü. “Ango kati tzübo ajunga menentsüba nenoki angashir asütsü. Tesüiba küm pongu nung Trinamool-i kanga menentsüba ajanga nenok Hilsa-a jena ogo,” ta lai ashi.

“Khen mapang ka nungbo (Hilsa ya) Bengal nümadangtsü liasü, ajisüaka tangbo Hilsa ji tangalen nungi dang alizüktsüsa kümogo. Aser iba ya Modi aser Mamata na ajanga lir,” ta lai ashi.

“BJP aser Trinamool nati senteper India nunger angopuba zütsük nokdang, ajisüaka asen ango aputsü atema asen kidanger linüktem nembo temelaba agütsür,” ta lai ashi.

“Modi-i arrtsü kümzüka ayutsü atemabo jembir saka angobo kümzüka meyuteter, anungji kodaser pai arrtsü kümzüka yutettsü (?) Iba atema tatishitsü tajungji Pathankot amakba lir,” ta Gandhi-i ashi.

“Mamata-Modi tezüngzüktep ya Bengal atema lendong tulu lir. Iba ya democracy atema lendong lir,” ta lai ashi.

BJP aser Trinamool-i yazü nangzükbatem nung mangmangtsüla ta shia Sonia-i nüburtem dang Congress aser CPM-i aniba Left Front nem vote agüjang, ta mepishi.

“Küm pongu jakdang Trinamool-i yazü nangzükba ajanga nenok ashioktsüogo, aser küm ana tejaklen Modi-ia kasaji inyaker. Tangbo BJP aser Trinamool-i tululu nangzükba nung metsüktsüla, saka Congress aser Left Front teloktep nem vote agüjang,” ta lai ashi.