Modi mapang nung Kashmir onük bentettsü: Mufti

Nuftii, August 27 (Agencies): Tanü Jammu & Kashmir Chief Minister, Mehbooba Mufti-i Kashmir nung stakeholders ajak den tiyongtsüi ia ken o jembitsü atema reju ka tenteta taoba mapang Ato kilonser, Atal Bihari Vajpayee-i benokba inyakyim maneni benshitsü atema benokogo.
Honibarnü New Delhi nung Mufti-i Ato kilonser, Narendra Modi ajurua Kashmir Valley tensa tebilemtsü atema o lemtepa liasü.
Ghonda ka shi Modi den senden amenba sülen osangbenertem den jembidang Mufti-i, “Ato kilonseria Jammu & Kashmir tensa atema kanga tebilemtsü akar. Iba ya ajak atema tebilemtsü onük ka lir. Ato kilonseri azü tokshiba anendaktsüner aser state tensa süngjemdaktsüner,” ta ashi.
July 8, 2016 nü nungi tenzüka state tensa raksaba sülen tang mezüng state Chief Minister-i Ato kilonser ajuruogo.
Mufti-isa, “Tenangzükba sentong nung adentsü atema Ato kilonseri tasütait mera agia  Nawaz Sharif (Pakistan Ato kilonser) jaoka liasü, iba sülen (pa) Lahore-i ao. Iba sülen tia makai kiralongrartemi  Pathankot amak,” ta lai ashi.
Laisa, taoba state Chief Minister, Mufti Mohammed Sayeed-i Kashmir onük bentettsüsa süra, two-third majority agi takok angusang Ato kilonseri dang akoktsü ta jembiogo, ta metetdaktsü.
“Pa (Modi) mapang nung ibaji matalokra kodanga mataloktsü. UPA sorkari inyakba ama Ato kilonseri Kashmir onük teti atema bentettsü asoshi lenmang angutsü ta ni tamang akar,” ta laisa ashi.
Chief Minister-i ashiba agi, lai Ato kilonser dang state nung stakeholders ajak den jembitsü asüngdangogo, aser ibaji reju ka ajanga dang akoktsü ta shiogo.
Laisa Separatist lenirtem dang state nung rara anentsü atema lar sorkar yaritsü mepishiogo.
July 8 nü Hizbul Mujahideen commander, Burhan Wani tepsetba sülen nungi tenzüka Kashmir nung anogo aika longkak aitdang tajemba agi nisung 68 tashi süogo.