Modi mopungsem samaogo, Rahul Gandhi-i linük anitettsü: Sanjay Raut

Mumbai, October 27 (Agencies): Shiv Sena MP, Sanjay Raut-i, Narendra Modi indang mopungsem samaogo, aser linük anitsü atema Congress tatong Tir, Rahul Gandhi dak sempet lir, ta ashi.
Shiv Sena ya NDA aser Maharashtra sorkar naprong nung BJP sorkar den loktepa aliba party ka lir, anungji pai jembiba oji BJP-i junga magizüktettsü.
Raut-i, Gujarat nung aliba nüburtemi Goods and Services Tax (GST) mapatong benokba atema sorkar dang jashir, anungji taküm December ita state election nung BJP-i tayongzükba tulu ajurutsü, ta ashi.
TV channel sentong ka nung jembidang pai, “Linük anitsü atema Congress lenir Rahul Gandhi temsüa lir,” ta ashi.
Iba sentong nung State Education Minister aser BJP lenir tain, Vinod Tawde nata liasü.
2014 küm Lok Sabha election nung BJP-i takok tulu anguba dak sendakba nung Shiv Sena leniri, “Iba linük nung yimtenren tashi tulutibaji nüburtem lir. Nüburtemi nisung mashie ka lenir kümdaktsütettsü,” ta ashi.
Uddhav Thackeray-i aniba party, Shiv Sena-i mapang shia Ato kilonser, Modi aser BJP sorkari aija arudar.
Gujarat nungbo Shiv Sena junga amenoka mali, ajisüaka parnoki Gujarat election nung Patidar lenir, Hardik Patel yaritsü, ta sangdongogo.
Raut-i, “2014 general elections nung Modi mopungsem liasü, ajisüaka iba mopungsemji tangbo samaogo. GST benokba sülen Gujarat lenmangtem nung nüburtemi longkak aiter. BJP-i tayongzükba tulu ajurutsüa akok,” ta ashi.