Modi noksa ‘Photoshopped’ asüba sülen temzüng tasen yanglushir

New Delhi, January 05 (Agencies): Tamil Nadu nung tzümetsüng aruba mapang Ato Kilonser Narendra Modi-i anüng nungi lendong ajanga takoksa bener aruba asadangba mapang tangokba noksa ka yanglushir prokshiba sülen Information & Broadcasting ministry (I&B)-i iba ama inyakyim nokdangtsü atema Standard Operating Procedure (SOP) tenzüktsü merangdar.
SOP ajanga VVIP temi tesem balala semdangba indang noksa ana agi ka küma yangluba nokdangtsü meranger aser nüngdakba department tem danga parnok tebilemba meshir.
I&B ministry kübok aliba Press Information Bureau (PIB)-i taoba ita Ato Kilonser-i Tamil Nadu nung tzümetsüng lendong asadanga jajaba mapang pa dena aliba noksa ana agi ka küma yanglur twitter ajanga lemsatepba nüburtem ajaki aija liasü.
PIB-i, “Iba noksa ya memeteti enoksemba lir anungji iba noksa entokogo,” ta metongshia ashi.
Iba noksa ajanga mepetmesü adokba sasar, ta PIB-i kanga sasa metetdaktsüogo.
“Noksa tenet twitter nung enokba rongnung kabo noksa ana agi ka küma yangluba densema liasü koba dang osangbenertemi ‘photo shopping’ ta ajar,” ta PIB-i ashi.
SOP ajanga Ato Kilonser-i jembishinüba internet ajanga melemsateptsü mera kar agidar ta osang kar ajanga jangjaogo.