Modi O Finance Minister na Kashmir tebilemtsü nung tebilemba balala:Congress

New Delhi, August 22 (Agencies) : “Jammu & Kashmir tebilemtsü nung sorkari kechiba nüburtem mangmangtsüsa inyakteter?” ta Hombarnü congress-i asüngdang.
Iba tebilemtsü tulu atema Ato Kilonser Narendra Modi aser Finance Minister Arun Jaitley nata tebilemba balala, ta parnoki ashi.
Congress-i ashiba agi, Ato Kilonser-i iba tebilemtsü atema sensaksem ka aginer, ajisüaka pa shiba den sensak asemtsü ashir ? Jammu & Kashmir tebilemtsü atema telemtetba takhang ang ka nüngdaker.
“Finance Minister-i Jammu & Kashmir yimsüsübaren tebilemtsü kecha mali saka terenlok tsütsü tetsükdaktsü adokba dang lir. Iba tenemtsüng state nung anogo 45 nü curfew alibaji terenlok nüngdakerba dang lir, ta sangdong ka ajanga metetdaktsüogo, anungji Ato Kilonser tena tebilemba khenyongi balala aser ibaji rasaa ashitsü nüngdak,” ta Congress otongdar Manish Tewari-i osangbenertem dang ashi.
“Ato Kilonser-ibo ano küm anabuba ojang asem—“Meimchir atema, lokti yimten aser Kashmir atema (Insaniyat, Jamooriyat, Kashmiriyat)—ya amshia jembir, ajisüaka pai ang süng item ojangtem tetetzü junga mangateti alitsü. Iba ya ajanga pa bang agi o tulu jembizükba sayur,” ta Tewari-i ashi.
“Tang ano pai sensak asemtsü indang jembir. Pai sensak ang semnür süra iba sensakji shiba den asemtsü ? Anungji iba ya ajanga Ato Kilonser aser finance minister na Jammu & Kashmir atema tebilemba balala ta jangja jangja metetdaktsür,” ta Tewari-i shisem.
Hombarnü Jammu & Kashmir opposition party tem nungi yimsüsürtem den senden ka akadang Ato Kilonser Narendra Modi-i Jammu & Kashmir tebilemtsüji terenlok kija agi makoktsü ta ashi.