Modi o Putin nati defence o shishilembatsü onük benoka jembitsü

New Delhi, October 11 (Agencies): Russia Tir, Vladimir Putin-i tan Honibar nü India semdangtsü sentong renema lir aser idangji India Ato Kilonser den ajurutepa, linük kümzüka ayutsü aser shishilembatsü onük tongtipangsüa benoka jembiba den linük ana tsüngda tongti tezüngzüktep ishika zülutepa agitsü.
Putin-i tan October ita 14-17 nü tashi Goa semdanga, BRICS Summit senden nung tan Deobar nü shilem agiba den India lenirtem den 17 buba Indo-Russia Annual Summit senden amentsü sentong renemba osang ka India external affairs ministry-i metetdaktsüogo.
“Ozü lenirtem tan ajurutepdang tesüsa Moscow nung 2015 küm December ita amenba Indo-Russia senden nung amendang agiba tezüngzüktep mapa küma inyakba osang agiba den tongti tezüngzüktep kar tatem küma agitsü sentong lir,” ta ministry-i metetdaktsü.
India-i linük kümzüktsü mapatong tenzükba mapang ka nung Russia lenisangi India semdangtsü sentong renemer lir.
Putin-i tan India semdangdang par Russia nungi 5 S-400 ‘Triumf’ long-range air defence missile systems aser Kamov-28 helicopters alizüktsü aser Sukhoi 30-MKIs tajungba küma yanglushitsü tezüngzüktep tatem küma agitsü alizüng India-i yua lir.
India-i maneni Russia nungi Akula-class nuclear submarine amshitsü temela agitsü sentong renemba den, par linük ana tsüngda sentakteptsü tenzüker küm 70 ajungbamong nüngtem nung taruba 2017 küm benjungmong amongtsü sentong tulu ayonga lir.