Modi sorkar küm ana jungogo

New Delhi, May 26 (Agencies): Brihostibarnü Narendra Modi’er sorkar küm ana jungogo aser iba anogo nung BJP-i, taoba Congress sorkari küm 60 nung meinyaktetbaji NDA sorkari küm ana nung inyaktetogo, ta ashi.

Congress-i Narendra Modi’er sorkar aitsütsü nükjidong nung tiyazü jembir ta shia BJP-i, iba yongji state balala nüburtemi opposition party (Congress) sentoka BJP agizük, ta ashi.

BJP National secretary, Shrikant Sharma-i, “Congress-i 2G spectrum ama, coal blocks mesüra LPG consumers aser MNREGA  ama ochimashi tulu toktsüba nungi sorkari maparen junga tenzük,” ta ashi.

“Tang mezüng yimtsüng 50000 nem broadband facility agütsüogo. Panchayat aser jila tila nema sen lakh 80 aser crore 21 agütsüogo. Ozü sorkarisa ex-servicemen nem one rank-one pension agütsüogo. Congress sorkari küm 60 nung meinyaktetba onoki inyaktetogo,” ta paisa ashi.

“Nisung crore 13 dak tema scheme balala ajanga tajangzük angur, linük melenshidar ajisüaka Congress-i Modi sorkar maginüba ajanga ibaji mereprangteter,” ta paisa shisem.

Tanü Ato kilonser, Narendra Modi-i, par sorkar yimsüsüba küm ana jungogo, ajisüaka pa yimsüsüba mapang nung ochimashi ken o maliasü, ta ashi.

Tanü UP, Saharanpur nung lokti senden ka nung jembidang Modi-i, “Linük nung ni ‘Tongti tenzüker’ asütsü atema ni nangzükogo aser maneni yamaji inyaktsü,” ta ashi.

“Ni Red Fort nungi, ni nenok tongti tenzüker lir ta shiogo aser India nunger crore 125 tenzüktsü atema alitsü,” ta paisa ashi.

“Ozü sorkari sensakertem atema inyaktsü. Sensakertemi sensak tia koktettsü atema onoki parnok tashi itshidaktsütsü,” ta pai shisem.