Modi sorkari advertisement nung sen crore 3,755 indokogo

New Delhi, December 08 (Agencies): Tesüiba küm asem aser ser tesadang nung Ato kilonser, Narendra Modi-i aniba sorkari advertisement nung sen lakh 3,755 tashi indokogo, ta Hokolbarnü RTI telangzüba ka ajanga osang jangjaogo.
2014 küm April ita nungi taküm October ita tashi nung electronic, print media aser outdoor publicity nung Modi-i aniba sorkari sen 37,54,06,23,616 indokogo, ta Information & Broadcasting Ministry-i RTI tasüngdangba atema telangzüba agütsüba nungji shia lir.
RTI application ji Greater Noida nung alir social activist Ramveer Tanwar-i agütsü.
Kasa osang ajanga, Centre sorkari community radio, digital cinema, Doordarshan, Internet, SMS aser TV ama electronic media advertisement nung sen crore 1,656 indok aser print media nung sorkari sen crore 1,698 dak tema indok.
Posters, booklets aser calendars ama outdoor advertisements nung Centre sorkari kasa mapang nung sen crore 399 indok, ta RTI telangzüba nung shia lir.
Sorkari advertisement nung indokba senji, tongtibang ministry kar aser sorkar flagship programmes atema küm ka piyong asoshi lemzüktsüba sen dang nungi timba liasü.
Tatishitsü agi; tesüiba küm asem nung sorkari mopung menenba anema inyakba nung sen teindokba ajak agi sen crore 56.8 dang liasü.
2016 küm Tanwar-i file asüba RTI telangzüba ka ajanga ashiba agi, 2014 küm June 1 nungi 2016 küm August 3 nü tashi nung Centre sorkari Ato kilonser, Narendra Modi adokba advertisement nung sen crore 1,100 indok.
Ano RTI telangzüba ka ajanga, 2015 küm July ita tashi nung Ato kilonser indang ita shia radio sentong “Mann Ki Baat” atema osangkakettem nung advertisement nung Centre-i sen crore 8.5 jungnüa indok, ta metetdaktsü.
2015 küm Delhi nung AAP sorkari advertisemtnt nung sen crore 526 indokba atema BJP-i AAP aija liasü.