Modi sorkari küm asem nung inyaktetbatem sangdongtsü

New Delhi, April 09 (Agencies): Ato kilonser, Narendra Modi-i aniba sorkar küm asem ajungtsü mapang ana nung lia NDAS sorkari minister ajak dang tesüiba küm asem tsüngda nüburtem ajangzüktsü atema ministry-i inyaktetba tongtibang onük pongu agujang, ta tetuyuba agutsüogo.
Tan hopta Information & Broadcasting Minister, Venkaiah Naidu-i minister ajak dang item osangtemji pa ket nung agüjang, ta shidi ajanga metetdaktsüogo.
Ministry balalai inyaktetba mapatemji kaket ka küma yanglutsü aser ibaji taruba ita May 26 nü matongdang nüburtem dang sayatsü. Küm asem tejaklen May 26 nü Narendra Modi Ato kilonser menden atema tenangzükba agia liasü.
Shidi nungji Naidu-i minister tem dang “Iba osangji kaket tapak asem nung agüjang” aser iba jagi onük pongu ayimjemtsüla, ta shia lir.
March 21, 2017 nüa Naidu-i minister tem aser BJP lenir taintem dang, Modi-i aniba NDA sorkari küm asem tsüngda nüburtem atema tajangzük bener arutsübatem indang nüburtem den lemtepang, ta shia liasü.
Linük nüburtemi BJP aser Ato kilonser, Modi agi melung asür, ta shia Naidu-i, “Modi telok nung adenba atema asenok ajaki nüma atanger, nübur aika tia melentsütsü atema pai (Modi) meranga inyaker. Taoba sorkartemi sendokba mapatem asenoki inyakba ajanga süngjang tajung tangtsüdar,” ta ashi.
Naidu-isa shidi nungji, “Asenoki sentong takang renemtsüla aser sorkari inyaktetba mapatem junga sangdongtsü atema tatalokbatem, züngdangbatem aser data tejangja agutsütsüla,” ta shia lir.
Shidi nungjisa sector balala nung onük yanglutsü asoshi minister kar nem mapa nunglokja lir.
Minister of State for External Affairs, M J Akbar dang Ato kilonser, Narendra Modi-i bendang linüktem semdangbatem, aser ibaji ajanga tajangzük angubatem aser bendang linüktemi India nung ‘invest’ asüba osang renemang, ta tuyu.
Iba den kasa MP ana- Swapan Dasgupta aser Chandan Mitra na danga tanga sector nung onüktem renemtsü tuyuogo.
“Sorkari küm asem abensatsü lia nüburtem dang küm asem ‘report card’ agutsütsü, aser iba report card ajanga tesüiba küm asem tsüngda sorkari inyaktetbatem metetdaktsü,” ta Naidu-isa ashi.
2014 küm BJP-i aniba NDA-i Congress-i aniba UPA sorkar atsüngdoka liasü.