Modi sorkari lenla aika nung tamakok nguogo: Shiv Sena

New Delhi, May 26 (Agencies): Narendra Modi’er sorkar küm ana ajungba anogo nung BJP den teloktep party, Shiv Sena-i, BJP-i aniba sorkari osettsüset nung jenjang atuba mazüoktet, bendanglen nungi linük telung nung kiralongraba menokdangtet aser küm ana nung tenzükba scheme balala nübur ket matong, ta aitsü.

Ato kilonser Modi-i tanen makai bendang linüktem semdangba aija Shiv Sena-i, par talidakji linük nung asü bendanglen’ar ibaji pai mezüng lemtettsüla, ta ashi.

Shiv Sena-i ashiba agi, tesüiba küm ana nung ochimashi ken o tulubo maliasü, ajisüaka sorkari osettsüset nung jenjang atuba mazüoktet aser jenjang atuba ajanga timtemertem  nem anisüngzük magütsütetba den külemi aluyimertem timtem atema meinyaktet.

“Küm ana nung Modi sorkari scheme ka nungi ka ta tenzükogo. Ajisüaka nüburtemi item scheme kata junga memetet. Taoba sorkaria nüngja balala nung kasa scheme tem benoka liasü, aser ibaji ochimashi nungang tembang,” ta Shiv Sena-i ashi.

“Modi-i black money meyipa bener arua nisung shia account nung sen lakh aika inoktsütsü nangzük, saka küm ana nung iba tenangzükba mataloktsü,” ta parnokisa ashi.

Bendanglen nungi kiralongraba manenokdangtetba atema sorkar aija Sena-i, “Pakistan nungi Kashmir nung kiralongraba manener. Asen sepaitem Maoists telungpur aser kiralongartem den raradang asür. Asenoki tang tashi kidanger linük den ken o jembir,” ta ashi.

State kar nung assembly election nung BJP-i aniba NDA sorkari takok mengutetba dak sentakba nung Shiv Sena-i, tang ama tensa ka nung Modi sorkari inyaktetbatem sangdongtsü menüngdak, kechiyong Bihar, West Bengal, Tamil Nadu aser Kerala state temi parnoksasa asadangtetogo, ta ashi.