Modi sorkari tamakok mejungi nguogo: Congress

Thiruvananthapuram, May 28 (Agencies): NDA sorkari parnoki inyaktetbatem sangdongbaji tiyazü aser tesüiba küm ana nung parnoki nangzükba kecha mataloktsü, ta Honibarnü Congress Party-i aitsüogo.
Kerala yimtiba, Thiruvananthapuram nung osangbenertem den jembidang Congress lenir, Anil K Shastri-i, “Mapa tasen adokdaktsüba, aluyimbaren ainba, GDP ainba aser chiyungtsü nung jenjang atuba azüokba nung Modi sorkari tamakok mejungi nguogo. Sorkari inyaktetbatem indang sangdongbaji yazü aser tesüiba küm ana yimsüsüba nung parnoki nangzükba ka danga mataloktsü,” ta ashi.
Pai ashiba agi, Modi-i nangzükbatem rongnung asaya menütsütsü aketba tulutibaji- black money meyipa bener arua senso shia bank account nung sen lakh 15 inoktsütsü atema nangzükba lir.
“Black money kecha mekaktet. Ano külen black money tali market nung adokogo,” ta Congress lenirisa aitsü.
Terenlok agütsütsü ta nangzükba nung ajemdaker NDA sorkar tashii aru aser parnoki nangzükba ama meinyak, ta paisa ashi.
Ato kilonser, Narendra Modi-i bendang linüktem kanga semdangba dak sentakba nung Shastri-i, “Ibaji ajanga India majungkettsü, saka Ato kilonser dang pasasa ajungket. Pa pasasa ajungketdakjang, saka pai Nobel prize kata mangutsü,” ta Shastri-i ashi.
“Modi-i linük nüburtemi nüngdakbatem aser tebilembatem atema inyaktsüla,” ta paisa shisem.