Modi sorkari temelenshi bener marutsü ama aikati bilemer

New Delhi, April 30 (Agencies): Narendra Modi’er sorkar office küm ana ajungtsü lia tanü survey tasen ka ajanga, Modi-er sorkar tashii aruba sülen temelenshi mali, ta telangzür shilem 49-i bilemer aser shilem 15-ibo tamajungba kümer ama bilemer, ta ashi.
Centre for Media Studies (CMS)-i ketdangsüa agiba survey ajangasa, “Telangzür shilem 43-ibo Modi’er sorkar kübok scheme aser programme balala ajanga sensakertem tajangzük mangur ama bilemer,” ta ashi.
Iba den külemi sorkar küm ana ajungdang shilem 62-i Narendra Modi-i Ato kilonser mapa inyakba ajanga temelung asür aser shilem 70-ibo pa maneni küm 5 sülena Ato kilonser inyakdaktsüner.
State 15 nung aliba yimti aser yimtsüngtem nungi nisung 4,000 shii iba survey nung shilem agia telangzüba agütsü, aser parnok rongnung shilem asem nungi shilem katibo Ato kilonseri nangzübatem inyaker ama bilemer aser shilem 48-i tenangzükbatem terabo inyaker ama bilemer.
“Tesüiba küm ana tejaklen dang nungibo tang nüburtem taküm jenjang tajungba kümer asü (?) ta asüngdangba nung shilem 49-ibo temelenshi mali ama bilemer ta langzü aser shilem 15-ibo tamajungba kumer ama bilemer ta langzü,” ta kasa survey ajanga ashi.
Yangi osangbenertem senden ka nung iba survey osang sangdongdang taoba mapang Lok Sabha Secretary General, Subhash C Kashyap-i, Ato kilonseri inyakba mapa agi aikati melung asür, ta ashi.
“NDA sorkari benokba mapatongtemji junger ta züngshir, ajisüaka osettsüset nung jenjang atuba aser mapa manguba onük nung maneni tebilemtsü akar,” ta CMS Director General, P N Vasanti-i ashi.
Union sorkari tamakok anguba tongtibang rongnung telangzür shilem 32-i osettsüset nung jenjang atuba indang ashi, iba sülen shilem 29-i mapa magütsütetba indang aser shilem 26-i bendanglen nungi black money meyipa bener marutetba indang ashi. Item ajak ya 2014 küm Lok Sabha election nung tongtibang tenangzükbatem lir.
Ano sorkari inyaktetba tongtibang rongnung telangzür shilem 36-i Jan Dhan Yojna scheme, shilem 32-i Swachh Bharat Mission aser shilem 23-i foreign direct investment indang ashi.
Union ministry rongnung tajungtibaji Railways liasü, iba sülen Finance aser External Affairs Ministry na liasü. Ano mejungi inyakba ministry rongnung Labour & Employment, Law, Rural Development, Consumer Affairs, Food & Public Distribution aser Social Justice & Empowerment ministry tem liasü.